"Отан отбасыдан басталады" атты тақырып бойынша эссе

Отан отбасынан басталады.

Әрбір қазақпын деген азамат, ол өз елінің патриоты болуы тиіс деп ойлаймын. Сол секілді мен де өзімді патриотпын деп толық айта аламын. «Отан отбасынан басталды» демекші. Кішкентай күнімнен ата-анам мені мектепке бермей тұрып-ақ, маған әнұранды жаттатқызып, рәміздер дегеніміз не екенін, олардың мемлекет үшін маңызы қандай екенін ұғындырып өсірді. Осылай менің туған Отаным деген алғашқы патриоттық сезім қалыптасты. Қазірде халқымыздың өткен тарихы мені қатты қызықтырады, ол туралы оқудан, танып-білуден жалыққан емеспін. Бұның барлығы менің ұлтыма деген сүйіспеншілік, оны сөзбен айтып жеткізу мүмкін емес.

Отан отбасынан басталады. Ал, отбасы неден басталады? Отбасы дегеніміз ол – әкең, анаң, бауырларың, жақын адамдарың. Шын мәнінде әрбір отбасы өзінше бір Отан. Отбасы деген сөздің өзіне терең үңіліп көрейікші. Ол біздің жанымыз жабырқағанда, қуанышқа бөленгенде ішкі тебіреністерімізді бөлісетін және өзімізді ең еркін, жайлы сезінетін баспана, жылы ұямыз. Оның басшысы, отбасының қамқоршысы мен тіреуі – әкеміз. Әкем отбасына қатысты бар мәселелерді шешіп, өз отбасының намысын қорғау жолында бар күш жігерін салатын, намысын бірінші орынға қоятын жан. Бізді де солай тәрбиелеп келеді. Өтірік сөйлемеу, кісінің ала жібін аттамау секілді қатал тәрбиені әкемізден алсақ, анамыздан мейірімділікті, қамқорлықты, бауырмалдықты, имандылықты бойымызға сіңіріп өсіп келеміз. Анам – есепші. Қазір менен де басқа қарындасым мен інімді тәрбиелеп келеді. Сондай – ақ, отбасы мүшелерінің де өзіндік атқаратын міндеттері бар. Баршамыздың осы ұядан ұшып шығатынымыз шындық. Отбасына деген сағыныштың жүрек түкпірінде мәңгілік сақталатыны оның бізді ақ үрпек балапан шағымыздан жылы бауырына басатыны бізді мәпелеп өмірдің қатал заңына тәрбиелейтіні рас. Сондықтан отбасы мүшелері бір – бірі үшін жанын қиюға да дайын тұрады. Сол сияқты Отанды қорғау да әр азаматтың азаматтық парызы. Отанымыздың алдындағы азаматтық борышымызды орындау мақсатында бар күш – жігерімізді салып аянбай еңбек етсек, бір – бірімізбен етене жақын болсақ, біріміз бәріміз үшін, бәріміз біріміз үшін дейтін тамаша бірлікті сақтай алсақ, онда біз бағындырмайтын биік жоқ.

Қазіргі кезде көп жастар шет елдерде оқып, сол елдерде қалып қойып жатыр. Бұдан Отанға деген ешқандай ізгі ниетті байқамаймыз, олар өзінің болашағына балта шауып жатқанын білмейді. «Атаңа не істесең, алдыңа сол келеді» деген. Сондықтанда отбасын қалай қадірлейміз, дәл солай Отанды да қадірлеп, қолдан келгенше аялауымыз керек.

Отбасы – ол адам баласының киелі мекені. Асыл, баға жетпес, қадірлі де қастерлі басты құндылығы.