Отбасы – отанымыздың ошағы

Отбасы – сыйластық, жарастық орнаған орта, кішкентай отан. «Отан отбасынан басталады»- дегендей, отанды сүю отбасынан басталады. Себебі, отбасы- бала тәрбиесінің ең алғашқы ұжымы. Оның ержетіп өсуі, бойындағы алғашқы адамгершілік белгілері отбасында қалыптасады, сондықтан да туған үйдің жылуы- оның көкірегінде көп жылдар бойы сақталып, мәңгі есінде жүреді. Отбасы табиғат сыйлаған кереметтердің бірі. Ата мен ана-бала тәрбиесінің қамқоршысы, өнегесі. Ата –асқар тау, Ана – бауырындағы бұлақ. Бала –жағасындағы құрақ,- деп ата-ана мен баланы табиғаттың тамаша құбылыстарына теңеген халық мақалына қайран қаларсың. Адалдық пен мейірімділік, жауапкершілік пен кешірімділікте отбасында шын ықылас пейілменен баланың көкірегінде орын тебеді. Қазақ отбасында әуелі әке, содан кейін ана, бұлар жанұя мектебінің ұстаздары болады. Әке мен ананың баласына қоятын ең бірінші басты талап-тілектері- баланың «әдепті» болып өсуі. Қазақ халқы отбасыдағы тәрбиені ең бірінші орынға қойған. Ата-ана балаларына қандай тәрбие берсе, ертең ол бала өскенде, сол тәрбие арқылы өмірдің жаңа баспалдақтарынан өтеді. «Ұяда не көрсең, ұшқанда соны ілерсің» деп қазақ халқы бекер айтпаған. Бала тәрбиесі ол дүниеге келген күннен-ақ басталады. Ұлын ұлтжанды, қызын инабатты, сыпайы етіп өсіру ол әр ата-ананың міндеті болып табылады. «Отбасы кішкентай мемлекет» демекші, мен өз отбасыммен айрандай ұйыған тату-тәтті өмір сүремін. Менің отбасымда бес адам бар. Олар: қара шаңырағымыздың ақылшысы, арқасүйеріміз- жан әкешім. Бір қолымен әлемді тербеткен, түн ұйқысын төрт бөлген – аяулы анашым. Әр дайым көмектесетін екі інім және мен. Бірін-бірі демеп, сүйеу бола біліп, өмір бойы ынтымағы жарасқан отбасы қатарынан қалмаудан үміттенемін. Мен өз отбасымды мақтан тұтамын!

Ә.Науаи атындағы №13 мектеп-гимназияның 5-Ә сынып оқушысы Еменова Севинч