Өзін-өзі тану пәнінен сабақ жоспары: Тақырыбы:"Еңбекқорлық пен еріншектік" 4-сынып

Сабақ мақсаты:

Оқушыларға еңбекқорлық пен еріншектікті салыстыра түсіндіру арқылы дұрыс іс-әрекет құндылығының мәнін ашу.

Міндеттері:

Білімділік: Еңбектің адам өміріндегі мәні туралы түсінік беру; 
Дамытушылық: Еңбек ету арқылы шыдамдылық қасиеттерін дамыту; 
Тәрбиелік: Еңбексүйгіштікке, жауапкершілікке тәрбиелеу.

Ресурстар: (материалдар, дереккөздер) интерактивті тақта, дәйексөз, бейнеролик, оқулық, дәптер

Сабақ барысы:

1.Ұйымдастыру кезеңi.

«5Т – тәртіп, талап, тыныштық, тазалық, татулық» ережесін еске түсіру.

Топқа бөлу:

1-топ: Жүректер

2-топ: Күндер

3-топ: Аялы алақандар

2.Тыныштық сәтi.

Су асты патшалығына ойша саяхат.

Балалар қолдарыңды тізенің үстіне немесе үстелдің үстіне қойып, аяқтарыңды айқастырмай, денелеріңді бос ұстаңдар. (Жайлы, баяу музыка қойылады).

Мұғалім: Енді, көзіңізді жұмыңыз және бірнеше рет терең тыныстаңыз. Бірнеше секундтан соң теңіз түбіне саяхат жасаймыз. Теңіз жағасымен келе жатқаныңызды елестетіңіз. Толқындардың жеңіл шалпылына, шағалалардың шуылына құлақ түріңіз. Жалаң аяқтарыңызбен құмды сезініңіз. Шалғайдан қара нүкте көріп тұрсыз: ол жақындаған кезде дельфин екенін түсіндіңіз. Ол сізді теңіз түбіне алып кету үшін келді. Ол өте әдепті, сізді шыдамдылықпен күтіп тұр. Жайлап оның арқасына отырыңыз, мықтап ұстап, жолға шығыңыз. Дельфиннің арқасында жайланып отырып, өзіңді қауіпсіз сезіну, су астында жүзу қандай керемет. Жан-жағыңызға қараңыз: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қараңызшы, қандай орасан зор балықтар, ал енді анау жаққа көз тастаңыз... бұл орасан зор сегізаяқ. Су асты неткен қызықты әрі ғажап әлем. Сіз бір нәрсені байқадыңыз ба? Мұнда неткен тұңғиық, толық тыныштық. Осы тыныштық күйде болыңыз.(Мұғалім бірнеше секунд үнсіз қалады).

Ал қазір жоғарыға, өз әлемімізге кері қайтуға дайындалыңыз. Айналаға жіті қараңыз. Ғажап түстерге тағы бір рет қараңыз және тыныштыққа құлақ түріңіз. Осындай тыныштық сізге самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін ризашылық білдіріңіз.Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз, осы түйсінген тыныштықты өз бойыңызда сақтауға тырысыңыз.

- Тыныштық сәті ұнады ма?

- Қандай сезімге бөлендіңіз?

3.Үй тапсырмасын тексеру

В. А. Сухомлинскийдің “Еңбексүйгіштік пен еріншектік” ертегісін оқу.

- Еңбексүйгіштің бойында қандай жақсы қасиеттер бар?

- Әулие еріншекке не себепті тағы да 99 жыл өмір сүруді берді?

-«Нағыз адамның өткен жолдары өшпейді» дегенді қалай түсінесіңдер?

- Еңбексүйгіш пен Еріншектің әрекеттерін салыстырып, ерекшеліктерін айтып беріңдер?

2 мин.

4. Дәйексөз.

«Еңбек – қуаныш, жалқаулық – айырылмас азап»

Абай

Абай (Ибраһим) Құнанбайұлы (1845-1904) — ақын, ағартушы, жазба қазақ әдебиетінің, қазақ әдеби тілінің негізін қалаушы, философ, композитор, аудармашы, саяси қайраткер, Семей облысында дүниеге келген.

Адамзат баласы әлімсақтан бері еңбек етіп, тер төгудің арқасында өсіп-өркендеп келеді. Қазақта "Еңбек - бәрін жеңбек" деген аталы сөз бар.

Адам, ең бастысы, еңбектенуге, бір іске күш – қуатын, ақыл – ойын жұмсауға ерінбеуі керек. Өйткені жалқаулық, еріншектік адамның өзін және өмірін тоздырады. Ал ерінбей еңбек етсең мақсатыңа, арманыңа жетесің. Арманың орындалса, өзіңді бақытты санайсың әрі еңбекпен өмірің жарқын болады. Сондықтан еңбектің адам өміріндегі алатын орны ерекше... Еңбек етсең терлейсің, әрі ерлейсің.Еңбекшіл болу үлкен қасиет екенін есте сақтайық

4 мин.

5. Мұғалім сыйы: «Әке мен бала» бейнефильмі

- Бала неліктен әкесінің тілін алмады? - Әкесі неліктен тәттіні бір-бірден жерге тастап отырды?

- «Аз жұмысты қиынсынсаң, көп жұмысқа тап боларсың» деген нақыл сөзді қалай түсінесіңдер?

- Ата-аналарыңа көмектесіп, қуантқан кездерің болды ма?

Адам бойында табылып жататын ең бір жағымсыздық – еріншектік. Бұл әдет – бүкіл дүниедегі өнердің дұшпаны. Өйткені еріншек кісінің мойны іске жар бермейді. Осыған байланысты Абай атамыз 38 - қара сөзінде: «Күллі адам баласын қор қылатын үш нәрсе бар. Содан қашпақ керек. Әуелі – надандық, екінші – еріншектік, үшінші - залымдық» - деген екен.

4 мин.

https://youtu.be/LxqudWHXZe4

6.Шығармашылық жұмыс.

1 топ - «Жүректер» тобы – «Еңбекқор» мен «Еріншек» балаларға мінездеме жазу

2 топ – «Күндер» тобы – Еңбек, еріншектік туралы мақал-мәтелдер жазу

3. топ - «Аялы алақандар» - еңбек жайлы эссе жазу

15 мин.

7.Топпен ән айту.

Болайықшы осындай

Өлеңі мен әні: А.Меңжанованікі

Жақсы бала еңбекшіл

Ер-азамат болады.

Қиындықты жеңіп кіл,

Құшағы гүл толады.

Қайырмасы:

Еңбекшіл осындай,

Болайықшы досым-ай.

Таза бала мұнтаздай,

Сүйсінеді қараған.

Ұқыпты деп бұл қандай,

Жақсы көрер бар адам.

Қайырмасы:

3 мин.

8.Үй тапсырмасы.

Роза Әбілқадырованың «Әдемі әже» әңгімесін оқу

Оқулықтың 111 беті

1. Сабақтың соңғы тыныштық сәтi.

2. Мұғалімнің сөзі:

Енді көзімізді жұмып осы сабақта айтылған ойлар мен істерді ой елегінен өткізіп көрейікші.Сабақта көрініс тапқан жақсы қасиеттер жүректерімізде сақталып, іс жүзіне асырылсын. Жайлап көздеріңізді ашуға болады. Сабақ аяқталды. Бүгінгі күндерің сендерге тек қуаныш әкелсін!

2 мин. Демалу жаттығуларының музыкасы ойнап тұрады.