Психология-медицина әлемінде (эссе)

БҚЖМК 1 курс студенті Ибрагим Арайлым

Пән оқытушысы: Махуова Г.Е

«Психология- медицина әлемінде»

(Эссе)

Мен үшін психология ғылымының маңыздылығы, артықшылығы көп. Бұл біздің өміріміздің әр бағытын иелену қабілеттілігін арттырады. Психология түрлі күрделі жағдайларды шешуге көмектеседі, атап айтқанда біздің күн сайынғы тұрмыстағы, жұмыстағы, оқу кезіндегі көптеген жағдайларды шешу.

«Барлық халық барлық ұлы және тамаша нәрселерді жасауға қабілетті», деп Б.Момышұлы айтпақшы біз барлық істі атқаруға қабілетті болып келеміз. Егер адам армандап, мақсат қойып оған жету үшін талпыныс жасау кезінде психологиялық жағынан дайындалу керек. Алдағы уақытта түрлі қиындыққа шыдамдылық таныта аламын, сынақтарға сынбаймын деп өзіне мотивация беріп, өзін-өзі жігерлендіруі қажет. Бұл жағдайда да бізге психология ғылымы көмекке келеді.

Қазіргі таңда психология саласы білім беру жүйесінде де, денсаулық сақтау саласында да және басқа да кәсіп түрлерінің ажырамас бір бөлігі іспеттес. Соның ішінде медицина психологиясы дәрігерлер мен ауру адамдар арасындағы қарым-қатынастың орнатылуында, науқастардың мінез-құлық ерекшеліктерін анықтай отырып, соған сәйкес көмек көрсету кезінде маңызды рөл атқарады. Дәрігерлер өз қызметінде алуан түрлі мінезге ие науқастармен, олардың туысқандарымен және өзінің әріптестерімен тиімді қарым-қатынас орнатып жұмыстануына тура келеді. Мәселен, мазасыз, депрессияға ұшыраған, агрессивті және т.б. тұлғалармен қарым-қатынас орнату. Дәрігер маман кез келген жағдайда өз эмоционалды жағдайын басқарып, өз бойында төзімділік, сабырлылық қасиеттерін қалыптастыруы керек. Науқас адам медицина қызметкеріне денсаулығындағы кінәраттарын айта отырып, оған үлкен сенім артады, сондықтан сол сенімді жоғалтып алмас үшін науқасты неғұрлым қолдап, өз адамгершілік қасиетін берік сақтауы қажет.

Психология – адамның ішкі рухани әлемін зерттейтін ғылым. Медициналық оқу орындарындағы болашақ дәрігер мамандарды даярлауда психология пәнінің оқытылуы дұрыс деп есептеймін. Әсіресе болашақ маманның коммуникациялық мәдениеттілігін дамыту, «Мен-тұжырымдамасы» мен өзіндік бағалауы қалыпты деңгейде болуына әсерін тигізеді. Дәл қазір өзім осы пәнді оқып жатырмын, пәннің материалдары өзім үшін қолжетімді, барлығы түсінікті. Осы пәнді оқып бастағалы мен өзімнің мамандығыма келу себебім одан әрі айқындала түсіп, шешуші сұрақтарға жауап алдым десемде болады.

Әр адамның психологиясы әртүрлі. Ал психологиясы дұрыс қалыптасқан адам өмірде көптеген жетістіктерге жетеді.

«Өзінің ішкі сарайына көз жүгірте білетін әрбір адам – психологияның дап-дайын тұрған дәрісі» деп К.Д.Ушинский айтқандай, адам психологиясын танып-білу ұлы қызмет болып саналады.