Қайырымдылық –адамгершілік белгісі №65 орта мектебінде 10 қаңтар- 10 ақпан аралығында республиканың барлық аймақтарында өтіп жатқан «Қамқорлық» акциясы «Қайырымдылық –адамгершілік белгісі» тақырыбында өткізілуде. Акцияның негізгі мақсаты-тұрмысы төмен отбасы балаларына әлеуметтік қолдау көрсету, киім кемшек, оқу құралдарымен қамтамасыз ету, әлеуметтік себептермен сабаққа қатыспай жүрген оқушыларды анықтау, қол ұшын беру. «Қайырымдылық жасасаң, қайырын өзің көрерсің» дегендей №65 орта мектептің директоры Жұмабай Мирманов, мектеп директорының тәрбие ісі жөніндегі орынбасары Жаннұр Айжігітова, әлеуметтік педагог Нұргүл Айжігітова, «Шуақ» бірлестігінің жетекшісі Ажар Нысанбаева акцияны ұйымдастырып және ұстаздар қауымы жұмыла атсалысып, игі шараға қолдау көрсетті. Акция барысында мектепішілік бұйрық шығарылып, жоспар құрылды. Ауылдағы кәсіпкерлерге үндеу хаттар таратылды. Акция аясында «Біз бақытты баламыз» тақырыбында оқушыларға бақытты балалық шақты бейнелейтін суреттер салғызылды. Суреттерінен көрме ұйымдастырылды. Әлеуметтік педагог Нұргүл Айжігітова аз қамтылған отбасындан шыққан оқушыларды татулыққа, жанашырлыққа тәрбиелеу мақсатында «Өміршеңдік» ережесін айтып, «Бәрі менің қолымда» атты тренинг өткізді. Демеушілерді, кәсіпкерлерді тарта отырып, аз қамтылған отбасынан шыққан балаларға, қорғаншы тағайындалған балаларға «Қайырымдылық- адамгершілік белгісі» тақырыбында мерекелік концерт өткізілді. Демеушілер марапатталды. Қамқоршылық акциясы негізінде демеушілер кәсіпкерлер тарапынан оқушыға бас киім, куртка, жемпір, қолғап, оқу құралдары табыс етілді. Өздері сұраныс жасаған барлық киімдермен қамтамасыз етілді.«Жақсының жақсылығын айт, нұры тасысын» дегендей жақсылық жасап, болашағымыз оқушылардың жанын жадыратуға себепші болған ұстаздарға, кәсіпкерлер Б.Тынаев, З.Есжігітова, Р.Қарақұлов, Н.Нұрмаханов , Якудаева Б, А.Әділов секілді азаматтарға алғысымызды білдіреміз. Осындай жақсы істер мектебімізде әлі де жалғасын таба береді. Қамқоршылық акциясы аясында 50 000 теңгеге сыйлық жасалды.Үлкен жүректі, мейірімді жандарға айтар алғысымыз шексіз.