? ЕРЕСЕК ТОПҚА АРНАЛҒАН ЖАҢА ЖЫЛДЫҚ КВЕСТ-СЦЕНАРИЙ

«ҚАР ПАТШАЛЫҒЫНЫҢ ЖОҒАЛҒАН КІЛТІ»

Ересек «Қуаныш» тобы

? 1-БӨЛІМ. КІРІСПЕ

Балалар “Шырша жыры” әнімен ортаға би билеп шығады!

Зал мерекелік әуенмен безендірілген.

Шырша жанбай тұр.

Жүргізуші:– Сәлеметсіңдер ме, Қош келдіңіздер, құрметті қонақтар, балалар!
Қараңдаршы, залымыз қандай әдемі! Бұл – Жаңа жылдың сиқырлы мекені.
Бүгін бізді ән, би, ойын және қызықты тосынсыйлар күтіп тұр! Олай болса ертеңгілігімізді әнмен бастайық, балалар!

Ән: «Келді міне, жаңа жыл!»

Бүгін «Бүлдіршін» балабақшасында, ересек «Қуаныш» тобын ерекше Жаңа жылдық саяхат күтіп тұр. Бірақ бір мәселе бар балалар... Біздің шыршамыз көңілсіз, әрі жанбай тұр. Себебі оны жағатын Сиқырлы Қуаныш Қазынасының кілті жоғалып кеткен.

Осы сәтте ортаға әуенмен Ақшақар қуанып келіп, кейін қайғырып қалады.

Ақшақар: – Балалар, Аяз ата келе жатыр, бірақ біз кілтсіз шыршаны жаға алмаймыз. Кілттің 5 бөлігін Қар патшасы әр жерге шашып кетіпті… ал сендер бүлдіршіндер, сол кілттің бөліктерін табуға көмектесесіңдер ме?

Балалар: Иә! Көмектесеміз!

Жүргізуші: – Онда сапарды бастайық! Әр станцияда тапсырмалар болады. Дұрыс орындасаңдар – кілттің бір бөлігін аласыңдар.

Жеңіл, ертегілік әуен ойнап тұрады

❄️ 2-БӨЛІМ. КВЕСТ БАСТАУ

СТАНЦИЯ 1 — «ҚАРҒА ТОЛЫ ОРМАН»

Зал бұрышы жасанды ағаштармен, мақта-қарлармен безендіріледі. Қар түйіршіктері әр жерде еденге шашылып тұрады.

Тапсырма 1 «Қар түйіршіктерін жинау»

Балалар белгі бойынша жаймен қар түйіршіктерін тереді. Оның ішінде біреуінде жұмбақ бар.

Жүргізуші:– Қардың ішіндегі құпияны табайық!

Жұмбақ: Аспаннан түседі,

Жерге жетсе еріп кетеді. (Қар)

Балалар шешеді.

Ағаштың артына жасырылған кілттің 1-бөлігі табылады.

Жүргізуші: – Жарайсыңдар, балалар! Кілттің бірінші бөлігін таптыңдар!

Ендігі кезекте балалардың жаңа жыл туралы тақпақтарын тыңдайық!

Жаңа жылдық тақпақтар!

Көңілді қар әуені ойнап тұрады

⭐ СТАНЦИЯ 2 — «АҚ АЮДЫҢ СЫНАҒЫ»

Ортаға Ақ аю (тәрбиеші костюмде немесе маскамен) келеді.

Ақ аю (қалың дауыспен): – У-у-у! Бұл орманнан өту оңай емес! Менің жолыммен жүре алсаңдар ғана кілт беремін.

Жерге Аюдың іздері қойылады.

Тапсырма 2: «Аюдың ізімен жүр»

Балалар кезекпен секіріп, теңселіп шеңберлерден өтеді.

Өткен соң аю қуанып:

Аю: – Мықты екенсіңдер, балалар! Міне, кілттің 2-бөлігі!

Балалар алады.

СТАНЦИЯ 3 - «ӘУЕН ЕЛІ» Ойын түрінде

Ақшақар:– Бұл елде қимылдар әуенге бағынады. Қателеспей орындай алсаңдар – сыйлық сендерде!

Тапсырма 3: Музыкалық қимылды ойын

Жүргізуші: Әртүрлі қысқа әуен бөліктері қосылады, ал сендер сол әуендердің әрқайсысының қимылын шатаспай орындауларың қажет. Сендер;

• Қоңырау сыңғыры болғанда – секіру қажет

• Жел гуілі болғанда – айналу қажет

• Қардың сықыры естілгенде – жай жүру, қолдарын жоғары көтеру

3–4 рет қайталанады.

Соңында Ақшақар қораптан қағаз шығарады.

Ақшақар: Балалар бізге Қар патшасынан жұмбақ келіпті

Жұмбақ: Ұшып жүрер жер үсті,

Ақ мамықтың ең мықты. (Қар ұлпасы)

Шешкен соң қоржыннан 3-бөлігі беріледі.

⭐ СТАНЦИЯ 4 — «СЫРЛЫ ҚОРАПТАР»

Үш қорап қойылады:1 — бос емес, ішінде салмақты ойыншық, 2 — жеңіл,іші бос, 3 — кілт жасырылған қорап

Жүргізуші: – Қай қораптың ішіне кілттің бөлігі тығылған? Сілкіп тыңдап көріңдер!

Тапсырма 4: Дыбысты ажырату

Балалар қораптарды тыңдайды. Ең жеңіл қорапта – кілт бөлігі.

Жүргізуші: – Дұрыс таптыңдар! Міне, төртінші бөлік!

Музыка: жеңіл, қызықты дыбыс.

⭐ СТАНЦИЯ 5 — «ҚАР ПАТШАСЫНЫҢ СЫНАҒЫ»

Қар патшасы қатты дауыспен сөйлейді.

Қар патшасы: – Ха-ха-ха! Мен сендерге оңайлықпен кілтті бермеймін! Менің көңілімді көтеретін көңілді биімді орындай алсаңдар ғана соңғы бөлігін табасыңдар!

Жүргізуші: Қар патшасы, біздің балалар өте өнерлі, сенің тапсырмаңды оп-оңай орындай алатынына біз сенеміз, біздің топтың ұлдарының көңілді биін қабыл алыңыз ендеше!

Тапсырма 5: “Көңілді санталар” биі

Қар патшасы «жұмсарып»:

– Жарайсыңдар! Бүгін сендерді жеңу мүмкін емес екен! Кілттің соңғы бөлігін сендерге Аяз атадан беріп жібердім.

? 3-БӨЛІМ. ФИНАЛ

Жүргізуші: Рахмет саған, Қар патшасы! – Жарайсыңдар, балалар! Сендер бүгін сондай ақылды болып, Қар патшасының сынақтарынан сүрінбей өттіңдер!

Ақшақар: Ендеше ортаға Аяз атаны дауыстап шақырыйықшы балалар!

Барлығы: Аяз ата келіңіз,

Мерекені көріңіз

Сол сәтте әуен ойнап, ортаға Аяз ата кіреді.

Аяз ата:– Оһо! Менің батырларым, сендер болмасаңдар Жаңа жыл болмай қалайын депті ғой! Жарайсыңдар, бүгін сендер ерлік көрсеттіңдер! Міне кілттің соңғы бөлігін Қар патшасы сендерге беріп жіберді.

Жүргізуші: Қане балалар, соңғы бөлікті қосайық, мерекені бастайық! Балалар ортаға келіп, 5 бөлікті үлкен суретті кілтке біріктіреді.

Аяз ата: Кілт дайын ба, балалар?

Балалар: Дайын!

Аяз ата: Қане бөбектерім, олай болса, біздің әсем шыршамызды жағып, мерекені жалғасытырайық!

Шыршаны жағу рәсімі

Балалар бәрі бірге:

«Жаңа жылым таңырқат,

Шамдарыңды жарқырат!» – 3 рет айтады.

Шырша жанады.

Жүргізуші: Қандай керемет, балалар, әсем шыршамыз жарқырай түсті, олай болса, ортаға шеңберге тұрып, шыршамызға арнап ән орындап берейікші балалар!

Ән: «Орманда шырша туыпты»

? 4-БӨЛІМ. МЕРЕКЕ

Балалардың тақпақтары (Аяз ата туралы)

Балалар кезекпен Жаңа жыл туралы өлеңдерін оқиды.

Жүргізуші: Аяз ата, құрметті қонақтар, келесі кезекте, сіздердің назарларыңызға сұлулық пен әсемдікке толы біздің қыздарымыздың үнді биін ұсынамыз. Ортаға біздің өнерлі қыздарымызды шақырамыз!

Би: «Үнді биі» (Қыздар)

Ақшақар: Ата балалар сізді асыға күтті, сізбен ойын ойнағысы келеді. Сіздің мұзды таяғыңызбен «Мұздатамын» ойынын ойнасақ қайтеді?

Аяз ата: Әрине, қызым, ойнасақ ойнайық

Ойын: «Мұздатамын»

Жүргізуші: Аяз ата, Рахмет сізге, балаларымыздың көңіл-күйі бір көтеріліп қалды.

Асығып күткен жаңа жылдық мерекеміз де, соңына таяп қалыпты. Жаңа жыл құт-береке әкелсін, Жаңа жылда жаңа жыр болсын, жаңа нұр болсын дей отырып, бүлдіршіндерімізді «Жаңа жыл» әнімен ортаға шақырамыз!

Ән: «Жаңа жыл»

Аяз ата: Қандай өнерлі, ақылды балалар! Ал енді, сендердің осы өнерлерің мен батылдықтарың үшін сендерге сонау алыстан арқалап келген сыйлықтарымды табыс еткім келіп тұр.

Мынау менің сиқырлы қапшығым,
Ішінде толған сыйлығым.
Бірақ ол ашылу үшін
Сендердің күлкілерің керек!

(Балалар қол шапалақтайды, сыңғырлап күледі — қап «сиқырмен» ашылады)

Аяз ата: – Жаңа жылда тек жақсы тілектер тілеймін! Жаңа табыстарға жете беріңдер!

Ендеше, сендер риза болсаңдар, біз одан әрі алыс сапарға аттанайық!

Бізді сендер сияқты бүлдіршіндер асыға күтуде!

Сау болыңдар балалар, Сау болыңдар қонақтар!

Аяз ата мен Ақшақар шығып кетеді!

Жүргізуші сөзі: Аяқтау!!!

№99 Бүлдіршін балабақшасы

Жаңа жылға арналған мерекелік іс-шара

Тақырыбы:

«ҚАР ПАТШАЛЫҒЫНЫҢ ЖОҒАЛҒАН КІЛТІ»

ЖАҢА ЖЫЛДЫҚ КВЕСТ – СЦЕНАРИЙ

Ересек «Қуаныш» тобы

Музыка жетекшісі: Жусипбекова М.

Тәрбиешілер:_______________

________________

Астана 2025 жыл