Ардақты ардагерлер! Қадірлі аға буын өкілдері!

Сіздерді «1 қазан – Халықаралық қарттар күні» мерекесімен шын жүректен құттықтаймын.

Біз, әрқашан «Үлкенге - құрмет, кішіден - ізет» деген аталы сөзді ұрпағының бойына сіңіріп өскен, қариясын қадірлеп, ардагерін ардақтаған текті елдің ұрпағымыз.

Ардагерлер – еліміздің алтын қоры. Тәжірибесі мол аға буынның өмір жолы біз үшін аса құнды. Сондықтан xалқымыз ертеден-ақ үлкенге құрмет көрсетуді өсиет етіп, ұрпақтар арасындағы сабақтастыққа, үйлесімге ерекше мән берген.

«Ата қайратты болса, бала ғибратты болады» деген қанатты сөз бекер айтылмаса керек. Сіздер сабырлылық, қарапайымдылық қасиеттеріңізбен біздерді мейірімділік пен еңбексүйгіштікке, Отанға, отбасына деген адалдыққа және абыройлы болуға тәрбиелеп келесіздер.

Бүгінде ауданымызда 26 тыл ардагері және 2935 зейнет жасындағы абзал қарияларымыз бар.

Қазіргі таңда зейнеткерлер мен ардагерлерге жан-жақты қолдау көрсету, үлкенді құрметтеу - мемлекет саясатының басым бағыттарының бірі.

Осыған орай ауданда "Тарбағатай ауданының арнаулы әлеуметтік қызметтер көрсету орталығы" КММ жанынан ашылған "Белсенді ұзақ өмір сүру" бөлімшесі – зейнет жасындағы азаматтарға жан-жақты қолдау көрсететін орталыққа айналды. Бұл бөлімше 2024 жылдың 12 ақпанынан бері жұмыс істеп келеді және жыл сайын 800-ге жуық зейнеткерді қамтып отыр.

Бүгінгі күні 11 нысанда мәдени және спорттық бағыттағы үйірмелер — емдік дене шынықтыру (ЛФК), скандинавиялық жаяу жүру, массаж, хор, вокал, шахмат сынды іс-шаралар тұрақты түрде ұйымдастырылуда. Бұл бағытта 16 маман халыққа сапалы қызмет көрсетіп келеді. Аталған бастама – аға буынның белсенді өмір сүруіне, қоғаммен тығыз байланыста болуына үлкен мүмкіндік беруде.

Құрметті Абзал ардагер ағалар, Қадірлі Асыл аналар!

Сіздердің әрбіріңіздің жүріп өткен жолдарыңыз, еткен еңбектеріңіз – ұрпақ үшін үлгі-өнеге.

Ақылы – дария, білімі – теңіз , өмірлік тәжірибесі мол сіздерден тәлім-тәрбие алған іні-қарындастарыңыз өздеріңіз бастаған игілікті істерді жалғастыруда.

Халық арасында аузы дуалы, әңгімесі бәтуалы өздеріңіздей ақсақалдардың барында ел ішінде жөнсіз істер орын алмайтындығы белгілі. Сіздерді бүгінгі мерекелеріңізбен шын жүректен құттықтай отырып, дендеріңізге саулық, отбасыларыңызға бақ-береке, ырыс-несібе тілеймін!