"Қашықтықтағы білім" атты мақала

Қашықтықтағы білім

"Мен бір жұмбақ адаммын оны да ойла" - деп ұлы Абай атамыз айтқандай, әрбір тұлға - жұмбақ. Сол жұмбақтың кілтін тауып, жүрек кілтін аша білу, әрбір жүректің құпия сырын оқи білу "Ұстаз" мамандығының ғажайып тылсым сыры.

Менің ұғымымда, біріншіден ұстаз міндеті өз пәнін шәкірттеріне жақсы үйретуден де тереңірек жатыр. Алдымыздағы әрбір бала қайталанбас бір ғажайып әлем десек, сол зерттелмеген таза құпияға терең үңіліп, баланың басқаға ұқсамайтын ерекше қасиеттерін тану, оның жүрегіне, жан дүниесіне жол таба білу - біздің, ұстаздардың бұлжытпас борышымыз.

Ұстаз ретінде мен тек жалаң білім беріп қоюмен шектеліп қалмауға барынша тырысамын. Ешқашан да есімнен ұлы ғұламамыз Әбу Насыр әл-Фарабидің "Адамға ең бірінші білім емес, тәрбие беру керек, тәрбиесіз берілген білім - адамзаттың қас жауы " деген ұлағатты сөзі шыққан емес. Бұл сөзді басты өмірлік кәсіби ұстанымым ретінде, алтын қазыққа байлап келемін.

Қазіргі таңда білім беріп жатқан сыныбым Мектепалды даярлық сыныбы. Мектеп табалдырығын алғаш аттаған, жаңа өмірге аяқ басқан кішкентай ғана бүлдіршіндер.

Қазіргі таңдағы пандемияға байланысты, мектепалды даярлық сыныбы да онлайн жүйесінде білім алуда. Әрине, мектептегі өмір бір бөлек. Мектепке келуге асығып жүрген балапандарға, сынып бөлмесінде сабақ оқу, қоңырауда достарымен ойнау тіпті асханаға барудың өзі қызық. Телефонның арғы жағынан кішкентай, ерке бүлдіршіндердің тілін тауып, олармен сөйлесіп, оқу, жазуды, санауды үйрету, тапсырма беріп, орындауын қадағалау оңай болмайтыны анық. Бірақ, сабақ басталғанын асыға күтіп отыратын балапандар, "Сәлеметсіз бе, апай? Мен сабаққа дайынмын" деген тәп-тәтті, жүректі елжірететін дауыстары барлығын ұмыттырады. Әрине кішкентай балапандар өз еріктерімен тапсырмаларды орындай алмайды. Сол себепті де ата-аналарының еңбегі зор. Шыдамдылықпен қарап, түсіністік танытып жүрген ата-аналарыма үлкен алғыс білдіремін.

Бүкіл қазақ елінің басына түскен қиындықты жұмылдыра жеңіп, қайтадан мектепке барып оқуды барлығымыз асыға күтеміз. Құрметті әріптестер сіздерге шыдамдылық тілеймін.