Қашықтықтан оқыту - уақыт талабы

Қашықтықтан оқыту - уақыт талабы

Қазіргі таңда елімізде коронавирус індетінің таралуы салдарынан карантин режимі бекітіліп, мектеп оқушылары 4 - тоқсанның сабағын үйлерінде онлайын және қашықтықтан оқуда. Бұған дейін мектеп партасында отырып, ұстаздың қарсы алдында білім алған шәкірт алғаш рет компьютер мен смартфонға телміруге мәжбір.

Осындай қиын шақта қолда бар мүмкіндікті барынша пайдалану қажет. Қашықтықтан оқыту - таңсық дүние емес. Жоғары оқу орындарында студенттер солай дәріс алады. Ал бұған дейін орта мектепке аса қажеттілігі болған жоқ.

Қазіргі жағдайда әлем елдері осы жүйе бойынша білім беруде.

Осындай сан қырлы әрі күрделі мәселелерді жүзеге асыруда мұғалімнің атқарар рөлі орасан. Оларға әрі ауыр, әрі жауапты міндет жүктеліп отыр. Қашықтықтан сабақ беретін оқытушы компьютермен сауатты жұмыс істей білуі шарт.

Дегенмен ол үшін жылдамдығы жоғары интернет керек екендігі түсінікті. Алайда еліміздің көптеген ауылдарында интернет түгілі ұялы байланыс желісі де орнатылмаған. Соның бірі - біз тұратын Бекі ауылы. Әйтсе де ұстаздар қауымы қол қусырып қарап отырмай, ақылдаса келе бұл тығырықтан шығудың жолын тапты. Ауылдан еріктілер тобы құрылып, тапсырмалады жазбаша түрде оқушылардың үйлеріне қолма - қол жеткізу ұйымдастырылды. Сондай - ақ балалар «Балапан» телеарнасы арқылы да білім алуда.

«Бірлік бар жерде тірлік бар» демекші, осы бір қиын кезеңде бірлесе жүріп, бір - бірімізге қолдау білдіріп, шыдамдылық танытуымыз қажет. Ата - бабаларымыз ел басына күн туған шақта бірлікке, сабырға шақырған. Алланың қалауымен қауіпті індетті жеңіп, бұл сынақтан да өтеміз. деп сенемін. Еліміз аман, жұртымыз тыныш болғай!

Маңғыстау облысы, Маңғыстау ауданы

Бекі бастауыш мектебінің мұғалімі

Молдашева Айжан Тұрарбекқызы