Қауіпсіз және сапалы тамақтану – оқушы денсаулығының кепілі

Қауіпсіз және сапалы тамақтану – оқушы денсаулығының кепілі

2026-2027 оқу жылында мектебімізде оқушыларды тегін ыстық тамақпен қамтамасыз ету жұмыстары ұйымдастырылды. Оқушының денсаулығы – мектеп ұжымының басты назарындағы маңызды мәселелердің бірі. Өйткені сапалы әрі құнарлы тамақтану баланың денінің сау болып өсуіне, сабаққа белсенді қатысуына және оқу үлгеріміне оң ықпал етеді. Осыған байланысты мектебімізде оқушылардың қауіпсіз, сапалы және құнарлы тамақтануын ұйымдастыруға ерекше көңіл бөлінеді.

Мектеп асханасында оқушыларға берілетін тағамдардың сапасы мен қауіпсіздігі тұрақты бақылауда. Тамақтану кезінде санитарлық талаптардың сақталуы, тағамдардың сапасы, дайындалу жағдайы, ас мәзірінің талапқа сай болуы және оқушыларға тағамның уақытылы ұсынылуы қадағаланады.

Оқушылардың тамақтануын бақылау мақсатында ай сайын бракераждық комиссия мүшелері тарапынан тексеру және мониторинг жұмыстары жүргізіледі. Комиссия мүшелері дайын тағамдардың сапасына, сыртқы түрі мен дәміне, ас мәзірінің сәйкестігіне және тамақтануды ұйымдастыру барысына назар аударады. Бұл жұмыстар оқушыларға қауіпсіз әрі сапалы тағам ұсынылуын қамтамасыз етуге бағытталған.

Сонымен қатар 2026–2027 оқу жылының І тоқсанынан бастап оқушылардың тамақтануын тіркеу Face ID жүйесі арқылы жүргізіледі. Аталған жүйе тамақтанатын оқушылардың есебін нақты жүргізуге және тамақтану үдерісін жүйелі түрде бақылауға мүмкіндік береді.

Мектеп әкімшілігі, әлеуметтік педагог және мектеп мейірбикесі оқушылардың күнделікті сапалы тамақтануын қадағалап, асханадағы тамақтану тәртібіне тұрақты бақылау жүргізеді. Оқушылардың тамақтану мәдениетін қалыптастыру, тазалық талаптарын сақтау және пайдалы тағамдарды тұтынудың маңыздылығын түсіндіру жұмыстары да назардан тыс қалмайды.

Дұрыс әрі қауіпсіз тамақтану – бала денсаулығының маңызды негіздерінің бірі. Сондықтан мектебімізде оқушылардың сапалы тамақтануын қамтамасыз ету бағытындағы жұмыстар жүйелі түрде жалғасын табады.

Біздің басты мақсатымыз – әр оқушының денсаулығына қамқорлық жасап, оның қауіпсіз, сапалы әрі құнарлы тамақтануына қолайлы жағдай жасау.

Орал қаласы, №1ЖОББМ

Әлеуметтік педагог Мукашева Г.А.