Қазақ тілі – ұлттың рухани қазынасы

Қазақ тілі – біздің рухымыздың, мәдениетіміздің, тарихымыздың алтын діңгегі. Тіл – халықтың жаны, ұлттың айнасы. Тіл арқылы ұлттың болмысы, дүниетанымы, салт-дәстүрі мен рухани байлығы ұрпақтан ұрпаққа беріледі. Сондықтан да, қазақ тілінің мәртебесін көтеру – әрбір азаматтың қасиетті борышы.

Бүгінгі таңда қазақ тілі – мемлекеттік тіл мәртебесіне ие, қоғам өмірінің барлық саласында қолданыс аясы кеңейіп келе жатқан тіл. Дегенмен, бұл бағытта атқарылар іс әлі де аз емес. Мемлекеттік тілдің шын мәнінде қоғамның тұтастығын қамтамасыз ететін қуатты күшке айналуы – оны әр азаматтың жүрегінен орын алуына байланысты.

Мектеп – тілдің тірегі, білім – тілдің негізі. Оқу орындарында қазақ тілін үйрету тек грамматика мен ережені меңгерту емес, сонымен бірге оқушының ойлау қабілетін, сөйлеу мәдениетін, ұлттық сана-сезімін дамыту болып табылады. Мұғалімнің шеберлігі мен әдістемелік ізденісі осы бағытта шешуші рөл атқарады.

Қазақ тілінің болашағы – жас ұрпақтың қолында. Сондықтан да, әрбір ата-ана, ұстаз, қоғам мүшесі қазақ тілінде сөйлеуді, оны құрметтеуді және насихаттауды өмірлік қағидаға айналдыруы қажет.

Қазақ тілі – ұлттың намысы, елдіктің белгісі, тәуелсіздіктің тірегі.

Тілімізді құрметтеу – өз елімізді, өз болашағымызды құрметтеу.

---

Қалдыбаева Ақбөпе Маратовна

Қазығұрт ауданының білім бөлімінің әдіскері