“Қазақ тілінің болашағы – жастардың қолында”

Қазақ халқының тарихымен бірге жасап келе жатқан, ұлттың рухани коды саналатын бай мұрамыз — қазақ тілі. Бұл тіл — ата-бабаларымыздың аманаты, ұлттың тірегі, елдігіміздің нышаны. Тәуелсіздікпен бірге мемлекеттік мәртебе алған қазақ тілі бүгінде даму жолында көптеген белестерді артта қалдырса да, әлі де үлкен жауапкершілік пен қолдауды қажет етеді. Осы жауапкершілікті арқалайтын, тілді тірілтіп қана қоймай, оны жаңа заманға лайық бейімдейтін — қазіргі жастар.Жастар — қоғамның қозғаушы күші. Олар қандай бағытта дамыса, елдің болашағы да сол бағытқа қарай бет алады. Сондықтан тілдің келешегін де осы буын қалай қабылдап, қолданса, соған байланысты қазақ тілінің тағдыры шешілмек. Тіл тек қарым-қатынас құралы ғана емес, ол — ұлттық сана, рух, мәдениет, ойлау жүйесі. Осы тілді игеріп қана қоймай, күнделікті өмірде қолдану — әр жас ұрпақтың парызы.Бүгінгі таңда қазақ жастары арасында өз ана тілінде еркін сөйлейтіндер де, өзге тілге бейімделіп, ана тілінен алыстап бара жатқандар да бар. Әсіресе, урбанизация мен жаһандану әсері, әлеуметтік желілердегі ағылшын-орыс тілінің ықпалы жастар тілінің сипатына өзгеріс енгізуде. Мұндай жағдайда қазақ тілін ұлықтап, заман талабына сай дамыту үшін жастардың белсенділігі аса маңызды.Көп жағдайда қазақ тілі тек тұрмыстық деңгейдегі қатынас тілі ретінде қарастырылады. Алайда ол ғылым, технология, бизнес, медиатехнология салаларында да өз орнын табуы тиіс. Бұл үшін ең алдымен жастар қазақ тілінде сапалы контент жасауы қажет: әлеуметтік желіде, блогтарда, подкасттарда, Youtube платформасында қазақ тілін қолдану аясын кеңейту — нақты әрекеттің бірі.Сонымен қатар ІТ саласы, медицина, инженерия, маркетинг секілді кәсіби бағыттарда қазақ тілінің қолданылуын арттыру арқылы тілдің практикалық құнын көтеруге болады. Мұны іске асыратын да — жаңа заманның, жаңа технологияның тізгінін ұстаған жастар.Тілді сақтау — бұл тек мемлекет не тіл мамандарының ғана міндеті емес. Әр қазақ азаматы, әсіресе, әрбір жас ана тілін білуге, құрметтеуге және қолдануға міндетті. Өз ана тілінде сөйлеуден ұялу — өзіңнің болмысыңнан, тарихыңнан, ата-баба рухынан ұялу деген сөз. Сондықтан жастар өздерінен кейінгі ұрпаққа үлгі бола отырып, қазақ тілінің тұғырын нықтап, келешекке сеніммен апара алады.Қазақ тілінің болашағы — тек заңдарда немесе бағдарламаларда емес, ол әрбір жастың жүрегінде, сөзінде, әрекетінде. Егер бүгінгі жас ұрпақ қазақ тілін саналы түрде таңдап, оны заманауи өмірмен ұштастыра білсе, ертеңгі күннің тілі де, ділі де қазақ тілінде сөйлейді. Сондықтан қазақ тілінің келешегі — жастардың қолында ғана емес, олардың жүрегінде де болуы тиіс.