Қазақша сөйлеу ұят па?!

Қазіргі таңда көптеген жастар қазақ тілін «кринж» деп санайтыны туралы жиі естиміз. Әсіресе, өз ана тілінде сөйлеу ұят саналып,
орыс тілінде еркін сөйлесу сәнге айналғандай әсер береді. Бірақ, менің ойымша, бұл қате түсінік пен тәрбиенің нәтижесі. Қазақ
тілін төмендету, оны ұят деп санау – біздің өткен тарихымызды, ұлттық құндылықтарымызды қадірлемеудің белгісі.

Шындығында, ана тілін құрметтеу – ұлттың санасын, мәдениетін сақтау мен болашағына деген жауапкершіліктің белгісі. Қазақтың
ұлы зиялылары, Алаш ардақтылары қазақ тілін дамыту жолында қаншама қиындықтар мен кедергілерді жеңіп шықты. Солардың арқасында
біз бүгінгі таңда қазақ тілін заңды түрде қолдана аламыз. Алаш зиялыларының ұрпағы бола тұра, бүгінгі жастардың ана тілінен
бас тартуы, тілдің қадірін түсінбеуі – тарихи мұраға деген немқұрайлы көзқарас деп есептеймін. Қазақ тілін қолдану және оны
насихаттау тек тіл мәселесі емес, бұл біздің ұлт ретінде ерекшелігімізді сақтап қалу жолындағы маңызды қадам. Егер біз өз
тілімізді қадірлемесек, болашақ ұрпаққа қандай мұра қалдырамыз? Өкінішке орай, қазіргі кезде екі қазақтың бір-бірімен орысша
сөйлесіп отырғанын көргенде іштей қынжыласың. Бұл тек тіл ғана емес, біздің ұлттық сана-сезімімізге, мәдениетімізге де әсер етеді.

Бұл мәселе, әрине, тәрбиеге байланысты. Егер біз балаларына қазақ тілінің маңыздылығын ұғындырсақ, олар ана тілінде еркін
сөйлеп, оны болашақта құрметтей білетін болады. Өкінішке орай, бүгінгі күні тілдің жай-күйі қоғамда өзекті мәселеге айналып отыр.
Қазақ тілін дамыту үшін бәріміз бірге әрекет етуіміз қажет. Қазіргі жастардың, әсіресе қазақтілді ортада өскендердің, орыс
тілін басым қолдануы – оның өмір сүру салтына айналғанын көрсетеді. Тіпті, кей жастар өз тілінде сөйлеуді ұят санайды. Бұл
мәселені шешу үшін тіл саясаты мен мәдениетті тәрбиелеудің маңызды рөл атқаратынын ұмытпауымыз керек. Қазақ тілін кемсітетін
«кринж» сияқты ұғымдар жастардың санасына терең еніп, оның құндылығын төмендетіп жатыр.

Қазақ тілін құрметтеу және оны дамыту – әрбір азаматтың борышы. Біз өз тілімізді тек қана күнделікті өмірде емес, сондай-ақ
отбасында, мектепте және қоғамда насихаттап, жас ұрпаққа оның құндылықтарын түсіндіруіміз керек. Өзіңнің тіліңді білу – бұл
ең алдымен өзіңді, өз халқыңды, тарихыңды білу деген сөз. Сондықтан қазақ тілін «кринж» деп санап, оны төмендетудің орнына,
әрбіріміз өз ана тілімізге деген құрметімізді арттырып, оны болашақ ұрпаққа дұрыс жеткізуге міндеттіміз.

Амангелді Данагүл Тұрарбекқызы