«Ұзынағаш ауылындағы №2 орта мектебі» КММ

Дефектолог мұғалім Омар Жібек

ҚАЗАҚСТАН РЕСПУБЛИКАСЫНДАҒЫ ИНКЛЮЗИВТІ БІЛІМ БЕРУДІ ДАМЫТУ ЖАҒДАЙЫНДАҒЫ АРНАЙЫ ПЕДАГОГТІҢ КӘСІБИ РӨЛІ

Эссе

Әрбір бала күн сияқты, тек оның жарқырауына мүмкіндік беруіміз керек. Ерекше білім беру қажеттілігі бар балалар да қоғамның бір бөлшегі.Бүгінгі таңда еліміздегі инклюзивті білім беруді дамыту жағдайында арнайы педагогтің кәсіби рөлі ерекше маңызға ие екеніне көз жеткізіп жүрміз. Қазіргі қоғамда білім беру жүйесінің басты міндеті – әрбір баланың жеке ерекшеліктерін ескере отырып, сапалы білім алуға тең мүмкіндік жасау. Осы тұрғыда инклюзивті білім беру идеясы ерекше білім беруге қажеттілігі бар балаларды жалпы білім беру ортасына кіріктіруді көздейді. Ал бұл үдерістің табысты жүзеге асуы арнайы педагогтің кәсіби қызметімен тікелей байланысты. Арнайы педагог ең алдымен ерекше білім беру қажеттілігі бар балаламен тереңдетілген педагогикалық диагностика өткізеді.Бұл баланың даму деңгейін, оқу мүмкіндіктерін, қажетті қолдау түрлерін нақтылауға мүмкіндік береді. Диагностиканың нәтижесі негізінде жеке білім беру бағыты мен түзету-дамыту жұмыстары жоспарланады, жеке дамыту бағдарламалары, түзете-дамыту бағдарламаларын құрастырады.Сонымен қатар арнайы педагог түзету-дамыту қызметін жүзеге асырып, баланың танымдық, тілдік, әлеуметтік және эмоционалдық дағдыларын қалыптастыруға ықпал етеді. Бұл жұмыс баланың әлеуетін ашуға және қоғамда өз орнын табуына мүмкіндік береді. Инклюзивті ортада арнайы педагог білім беру бағдарламаларын бейімдеуші маман ретінде де маңызды рөл атқарады. Ол оқу тапсырмаларын, әдіс-тәсілдерді және бағалау жүйесін баланың жеке ерекшеліктеріне сәйкес икемдейді. Сонымен бірге арнайы педагог пән мұғалімдерімен, психологтармен, әлеуметтік педагогтермен және ата-аналармен тығыз қарым-қатынаста жұмыс жасайды, командалық өзара әрекетті қамтамасыз етеді. Арнайы педагог мұғалімдер мен ата-аналарға инклюзивті оқытудың жолдарын түсіндіріп, баланың құқықтары мен мүдделерін қорғауға атсалысады. Қорытындылай келе, Қазақстан Республикасындағы инклюзивті білім беруді дамыту жағдайында арнайы педагог – баланың толыққанды дамуы мен қоғамға бейімделуінің негізгі кепілі болып табылатын жетекші кәсіби тұлға.

(267 сөз )

Мектеп директоры К.Т.Тлеукулов