Қазақстан Республикасының Орталық мемлекеттік мұражайындағы тәжірибе: тарих тереңіне саяхат

Қазақстан Республикасының Орталық мемлекеттік мұражайындағы тәжірибе: тарих тереңіне саяхат

Қазақстан Республикасының Орталық мемлекеттік мұражайында өткен өндірістік тәжірибе барысында музей ісінің көптеген қырларымен танысу мүмкіндігіне ие болдық. Тәжірибе барысында алған біліміміз бен дағдыларымыз болашақ мамандығымызға деген көзқарасымызды тереңдетті және музей жұмысының күрделілігін жан-жақты түсінуге мүмкіндік берді.

Музейдің материалдық-техникалық базасы, бай экспозициялық қоры, ғылыми-зерттеу, қор сақтау және экскурсиялық бағыттағы қызметтері жоғары деңгейде ұйымдастырылған. Мұражай қызметкерлері бізді музей құрылымымен, оның бөлімдерімен, жұмыс ерекшеліктерімен, сондай-ақ музей қорын қалыптастыру, сақтау және қалпына келтіру тәртіптерімен толықтай таныстырды.

Экспозицияларды аралау барысында Қазақстан тарихының ежелгі дәуірден бүгінгі күнге дейінгі негізгі кезеңдерін бейнелейтін құнды жәдігерлермен таныстық. Ежелгі сақ дәуіріне жататын археологиялық табыстар, оның ішінде “Алтын адам” экспонаты ерекше қызығушылық тудырды. Бұл жәдігер – қазақ халқының бай тарихи мұрасының көрнекті символдарының бірі. Сонымен қатар этнографиялық коллекцияны зерттеу арқылы қазақ халқының тұрмыс-тіршілігі, ұлттық киімдері, зергерлік бұйымдары, тұрмыстық заттары және киіз үйдің құрылымы туралы жан-жақты мағлұмат алдық. Бұл бөлім бізге көшпелі мәдениеттің ерекшеліктерін терең түсінуге көмектесті.

Музейдің жаңа және қазіргі заман тарихына арналған экспозицияларында еліміздің ХХ ғасырдағы және тәуелсіздік жылдарындағы дамуы туралы тың деректер ұсынылған. Кеңестік кезеңнің құжаттары, фотосуреттері мен естеліктері тарихи оқиғаларға жаңаша көзқараспен қарауға мүмкіндік берді. Ал Тәуелсіз Қазақстанның жетістіктері мен дамуы жайлы материалдар еліміздің қазіргі әлеуметтік-экономикалық және мәдени даму деңгейін көрсетеді.

Практика барысында біз музейдің экскурсиялық қызметімен де таныстық. Экскурсоводтардың жұмыс әдістерін бақылап, олардың материалды аудиторияға жеткізу шеберлігін меңгеруге тырыстық. Сонымен қатар, өзіміз де шағын экскурсиялар жүргізу арқылы теориялық білімімізді іс жүзінде қолдандық.

Қор сақтау және қалпына келтіру бөлімінде жүргізілген танысу жұмыстары барысында жәдігерлердің ұзақ уақыт бойы сақталуын қамтамасыз ету үшін жүргізілетін арнайы шаралармен таныстық. Мұрағаттық жұмыстарды жүргізу барысында құжаттарды жүйелеу, сақтау және есепке алу процестерін меңгердік. Сонымен қатар музейдің ғылыми-зерттеу жұмыстарының да маңыздылығын түсініп, ғылыми мақалалар мен зерттеулердің қалай дайындалатынын көрдік.

Тәжірибе барысында музей қызметкерлерінің өз ісіне деген жауапкершілігі мен кәсіби шеберлігі ерекше әсер қалдырды. Олардың әрбір экспонатқа мұқият қарауы, тарихи деректерді дәлдікпен зерттеуі және келушілерге сапалы ақпарат беруі музей ісінің қаншалықты маңызды сала екенін көрсетті. Музейде жұмыс істеу тек материалдық жәдігерлермен жұмыс істеу ғана емес, сонымен қатар рухани және мәдени құндылықтарды сақтау, оларды келешек ұрпаққа жеткізу жауапкершілігі екенін түсіндік.

Қазақстан Республикасының Орталық мемлекеттік мұражайында өткен бұл тәжірибе біз үшін үлкен тәжірибе мектебі болды. Тарихи мұраны сақтау, насихаттау және зерттеу жұмыстарында музейдің алатын орны зор екенін айқын түсіндік. Алған біліміміз бен дағдыларымыз болашақ кәсіби жолымызға сенімді қадам жасауымызға септігін тигізеді деп сенеміз