"ҚазҰУ – сапалы білім мен ғылыми жетістіктің символы"

Әл-Фараби атындағы Қазақ Ұлттық Университеті – Қазақстанның ғана емес, бүкіл Орталық Азия аймағының жетекші жоғары оқу орындарының бірі. Ғасырлық тарихы бар бұл білім ордасы бүгінде сапалы білім берудің, ғылыми-инновациялық дамудың және халықаралық мойындалудың жарқын үлгісіне айналып отыр. ҚазҰУ – ел мақтанышы, ұлттың интеллектуалдық капиталы мен ғылыми әлеуетін қалыптастырушы негізгі орталық.

Халықаралық деңгейдегі мойындалу

Әл-Фараби атындағы ҚазҰУ – Қазақстандағы алғашқы ұлттық университет мәртебесіне ие болған жоғары оқу орны. Соңғы жылдары университет беделі халықаралық рейтингтерде айқын көрініс тапты. QS World University Rankings мәліметтері бойынша ҚазҰУ әлемнің ең үздік 150 университетінің қатарына енді. Бұл – тек университет ұжымының ғана емес, бүкіл Қазақстанның жоғары білім саласындағы үлкен жетістігі.

QS "Graduate Employability Rankings" рейтингінде де ҚазҰУ түлектерінің жұмысқа орналасу көрсеткіші жоғары бағаланып, әлемнің үздік университеттерімен иық тіресті. Бұл – университеттің еңбек нарығының талаптарына бейімделе алған, заманауи маман даярлаудағы жоғары сапасын дәлелдейді.

Ғылым мен инновацияның орталығы

ҚазҰУ – ғылыми зерттеу жұмыстарын ұйымдастыру мен жүргізуде айрықша белсенділік танытып отырған жетекші университет. Мұнда жыл сайын жүздеген ғылыми жобалар жүзеге асырылады, оның ішінде халықаралық бағдарламалар мен гранттар да бар. Университет жанындағы ғылыми-зерттеу институттары мен зертханаларда жас ғалымдар мен студенттер озық технологиялармен жұмыс істеп, жаһандық ғылыми ортаға өз үлесін қосуда.

Сондай-ақ, ҚазҰУ технопаркі мен стартап-инновациялық орталығы арқылы ғылыми жобаларды коммерцияландыру бағытында тиімді жұмыс жүргізіп отыр. Бұл – университеттің ғылым мен бизнесті тоғыстыра білгені және экономикаға тікелей үлес қосып келе жатқанының айғағы.

Цифрлық университет және жасыл кампус

Қазіргі таңда ҚазҰУ цифрлық трансформация бағытында да көшбасшы саналады. Университет "Smart University" тұжырымдамасын енгізіп, оқу үдерісін толық цифрландырды. Электронды кітапхана, онлайн білім беру платформалары, виртуалды зертханалар – студенттер мен оқытушылар үшін қолжетімді.

ҚазҰУ кампусы – еліміздегі ең көрікті және экологиялық таза оқу кешендерінің бірі. Университет аумағында орналасқан ботаникалық бақ, жасыл аймақтар мен демалыс орындары білім алушыларға қолайлы жағдай жасайды.

Басқару психологиясы – заманауи маманның кілті

Қазіргі таңда Әл-Фараби атындағы ҚазҰУ сапалы білім мен ғылыми жетістікке негізделген жоғары оқу орны ретінде студенттердің жан-жақты дамуына баса назар аударады. Осы орайда, университетте оқытылатын "Басқару психологиясы" пәнінің маңызы айрықша.

Бұл пән – болашақ мамандардың басқару дағдыларын, көшбасшылық қабілетін, командамен тиімді қарым-қатынас орната білуін және адам мінез-құлқының психологиялық негіздерін түсінуін қалыптастырады. Қазіргі жаһандану жағдайында, әсіресе бизнес, білім беру, мемлекеттік басқару салаларында, тек кәсіби білімі жеткіліксіз – эмоциялық интеллект, психологиялық икем мен шешендік қабілет те аса қажет. Міне, осы дағдыларды меңгеруде «Басқару психологиясы» пәні үлкен рөл атқарады.

ҚазҰУ-де бұл пән практикалық және теориялық бағытта оқытылады, интерактивті әдістер, кейс-талдау, рөлдік ойындар мен тренингтер арқылы студенттердің нақты өмірлік жағдайларға бейімделуі қамтамасыз етіледі. Нәтижесінде, түлектер тек кәсіби маман болып қана қоймай, ұжымда сенімді басшы, жан-жақты тұлға ретінде қалыптасады.

Осылайша, «Басқару психологиясы» – ҚазҰУ-дың студенттерді тек біліммен емес, заманауи нарыққа қажетті адами, әлеуметтік, көшбасшылық құндылықтармен қаруландыруға бағытталған стратегиялық пәндерінің бірі.

Әл-Фараби атындағы Қазақ Ұлттық Университеті – еліміздегі білім мен ғылымның алтын діңгегі. Университет өз миссиясын – сапалы білім беру, ғылыми-инновациялық зерттеулерді дамыту, бәсекеге қабілетті мамандар даярлау ісін абыроймен атқарып келеді. ҚазҰУ – болашаққа сеніммен қарайтын, ұлттық рух пен жаһандық ойлауды қатар ұстанған ұлы университет. Сондықтан да ол – сапалы білім мен ғылыми жетістіктің нағыз символы.

Тленчиева Н. С.

педагогика ғылымдарының кандидаты

Кеңес А. Н.

радиотехника, электроника және телекоммуникациялар

мамандығының магистранты

Әл-Фараби атындағы Қазақ Ұлттық университеті