«Қош бол, балабақша!» – жүрекке толы қоштасу кеші

Карашева Алтын Отызбековна

№81 «Әсемгүл» балабақшасы МКҚК

Аңдатпа

Мақалада мектепалды даярлық тобының түлектеріне арналған «Қош бол, балабақша!» атты мерекелік ертеңгіліктің мазмұны мен тәрбиелік мәні баяндалады. Іс-шара барысында балалардың өнер көрсетуі, тәрбиешілер мен ата-аналардың жылы лебіздері, балабақшамен қоштасу сәттері көрініс табады. Бұл кеш балалардың мектепке қадам басар алдындағы жауапкершілігін арттырып, үлкен өмірге сеніммен қадам жасауына ықпал етеді.

Түйін сөздер

Қош бол балабақша, мектепалды даярлық, түлектер кеші, тәрбиелік іс-шара, өнерлі бала, ата-ана мен тәрбиеші ынтымақтастығы.

Негізгі бөлім

Мектепке дейінгі ұйымдағы ең әсерлі де толғанысты сәттердің бірі – балабақшамен қоштасу кеші. Осы орайда «Әсемгүл» балабақшасының «Райхангүл» мектепалды даярлық тобында «Қош бол, балабақша!» атты салтанатты ертеңгілік жоғары деңгейде ұйымдастырылды.

Кештің шымылдығын балалардың жүрекжарды құттықтау сөздері ашты. Олар қонақтарға ізгі тілектерін арнап, балабақшада өткізген балалық шақтарын еске алды. Салтанатты жиында балаларға білім мен тәрбие берген тәрбиешілер ортаға шақырылып, ата-аналар мен қонақтарға жылы лебіздер білдірілді.

Ертеңгілік барысында балалар ән айтып, би билеп, тақпақтар орындады. «Жұлдыз болғым келеді», «Үйретеді», «Оқып біліп үйренеміз» әндері мен «Ақ көгершін», «Қоштасу вальсі» билері көрермендерге ерекше әсер сыйлады. Сондай-ақ «Кім жылдам сөз айтады» ойыны ойнатылып, балалардың тапқырлығы мен шапшаңдығы байқалды.

Тележүргізуші форматындағы сұхбат балалардың мектепке деген ойы мен армандарын ашып көрсетті. Түлектердің тәрбиешілеріне арналған жылы лебіздері кештің әсерлі сәттерінің бірі болды. Ер балалар мен қыздардың орындауындағы билер мен вальстер мерекенің сәнін келтірді.

Кеш соңында балабақша меңгерушісі Маматова Жазира Сабырханқызы сөз сөйлеп, түлектерге ақ жол тілеп, белсенді ата-аналарға алғыс хаттар табысталды. Балаларға естелік ретінде «Балабақша өмірі» альбомдары ұсынылды. Тәрбиешілердің орындауындағы «Қимай тұрмын» әні кешке ерекше жылылық сыйлады.

Қорытынды

Қорыта айтқанда, «Қош бол, балабақша!» ертеңгілігі балалардың балалық шағымен қоштасып, мектеп өміріне сеніммен қадам басуына зор ықпал етті. Бұл іс-шара арқылы балалардың шығармашылық қабілеттері шыңдалып, тәрбиеші мен ата-ана арасындағы тығыз байланыс айқын көрінді. Осындай тәрбиелік мәні зор, мазмұнды кештер болашақ ұрпақтың рухани дамуына берік негіз қалдырады.