"Қуанышты жағдай " психологиялық тренинг

Тақырыбы: Қуанышты жағдай

Мақсаты: белгілі бір ұжым арасында жағымды қарым-қатынас қалыптастыру, ұжым мүшелерінің бір-бірі жайлы ақпарат алмасуы, басқаны зейін қойып тыңдау қабілетін дамыту.

Әдісі: психологиялық жаттығу

Нысаны: мұғалімдермен, жоғарғы сынып оқушыларымен, ата-аналармен

Көрнекіліктер: соңғы 3 ай аттары жазылған парақшалар, стикер, магнит, доп.

Қатысушылар саны: 25-30

Барысы: қатысушылар шеңбер бойымен отырады. Соңғы өткен 3 ай аттары жазылған парақшалар ілініп тұрады. Қатысушыларға стикерлер таратылып, нұсқаулықпен таныстырады.

Нұсқаулық: алдыларыңызда тұрған қыркүйек, қазан, қараша айлары бойынша өздеріңіздің отбасыларыңызда, жеке бас өмірлеріңізде немесе қызметіңізде болған сіз үшін ең маңызды болып саналатын жағдаяттарды есіңізге түсіріңіз. Ол не қыркүйек айында, не қазан, не қараша айында болуы мүмкін. Ол отбасыңыздағы өзгеріс, сіз үшін ең жақын отбасы мүшелеріңіздің қуанышы, қызметіңіздегі карьералық өсу, үйлену тойы, қандай да бір жетістікке жету, армандаған істеріңіздің орындалу т.б. болуы мүмкін. есіңізге түсірген жағдаятты алдыңыздағы стиекерге сурет арқылы бейнелеңіз. Мысалы: үйлену тойы болса –сақинаның суреті, карьералық өсу –баспалдақ, туған күн –тәтті бәліш және т.б. Салған суретіңізді жағдаяттың орындалған мерзімі бойынша алдыңызда тұрған қыркүйек, қазан, қараша айлары бойынша орналастырыңыз. Барлығы тапсырманы орындап болған соң қатысушыларды ортаға шақырып, әр қайсысы есімдерін атап, өздерінің салған суреттерін ауызша түсіндіруі тиіс. Мысалғы: менің атым Айжан. Мен бұл суретті салған себебім, қазан айында жоспарлап жүрген ісіміз аяқталып, өз мәресіне жетті. Яғни мен өз отбасыммен үй тұрғызып, қазан айында жаңа шаңырағымызға кірдік. Бұл біз үшін өте үлкен жеңіс, жеміс, біз отбасымызбен өте бақыттымыз.

Рефлексия: Әр қатысушы өзінің қуанышымен бөлісіп болған соң, барлығы шеңбер бойымен отырып, жаттығуды жалғастырады. Келесі кезекте қатысушыларға тағы нұсқаулық беріледі. Нұсқаулық: қазір барлығымыз бір –біріміздің қуанышымызбен бөлістік, ендігі кезекте әр кім қалауы бойынша допты алып қалаған қатысушыға лақтырып қуанышына ортақ екенін айтып құттықтап, жылы лебізін білдіруіне болады. Мысалғы: Айжан! Мен сені және сенің отбасыңды жаңа қоныстарыңмен құттықтаймын!Отбасыларыңда, тұрғызған шаңырақтарыңда тек береке, бірлік, қуаныш болсын! және т.б.