Сабақ жоспары. 7 сынып. Аялай біл, сен деп соққан жүректі

Өзiн-өзi тану сабағының жоспары

Мектеп: Шымкент қаласындағы физика-математика бағытындағы Назарбаев Зияткерлік мектебі

Мерзiм: 2.12.2016 №14 сабақ

Тақырып: Аялай біл, сен деп соққан жүректі

Құндылық: дұрыс әрекет Қасиеттер: мәдениеттілік, жауапкершілік, сыйластық.

Мұғалiм: Куандыкова А.К. Класс: 7 В Оқушылар саны: 20

Кәсіби даму мақсат: Жағдаяттарды талдау арқылы оқушылардың сыни ойлау дағдыларын дамыту

ӘБ жетекшісі: Куандыкова А.К.

Қосымша 1

Тыныштық сәтi. Су асты патшалығына ойша саяхат. (Оқушылардан еркін отыруды, қолдарын тізесіне немесе үстел үстіне қоюды, аяқтарын айқастырмауды өтініңіз. Арқаларын тік ұстауын қадағалаңыз. Жайлы, баяу музыка қойыңыз).

Мұғалім: Көзіңізді жұмыңыз және бірнеше рет терең тыныстаңыз. Денеңізді босатыңыз. Бірнеше секундтан соң теңіз түбіне саяхат жасаймыз.

Теңіз жағасымен келе жатқаныңызды елестетіңіз. Толқындардың жеңіл шалпылына, шағалалардың шуылына құлақ түріңіз. Жалаң аяқтарыңызбен құмды сезініңіз. Шалғайдан қара нүкте көріп тұрсыз: ол жақындаған кезде дельфин екенін түсіндіңіз. Ол сізді теңіз түбіне алып кету үшін келді. Ол өте әдепті, сізді шыдамдылықпен күтіп тұр. Жайлап оның арқасына отырыңыз, мықтап ұстап, жолға шығыңыз. Дельфиннің арқасында жайланып отырып, өзіңді қауіпсіз сезіну, су астында жүзу қандай керемет. Жан-жағыңызға қараңыз: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қараңызшы, қандай орасан зор балықтар, ал енді анау жаққа көз тастаңыз... бұл орасан зор сегізаяқ. Су асты неткен қызықты әрі ғажап әлем. Сіз бір нәрсені байқадыңыз ба? Мұнда неткен тұңғиық, толық тыныштық. Осы тыныштық күйде болыңыз.(Мұғалім бірнеше секунд үнсіз қалады).

Ал қазір жоғарыға, өз әлемімізге кері қайтуға дайындалыңыз. Айналаға жіті қараңыз. Ғажап түстерге тағы бір рет қараңыз және тыныштыққа құлақ түріңіз. Осындай тыныштық сізге самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін ризашылық білдіріңіз.

Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз, осы түйсінген тыныштықты өз бойыңызда сақтауға тырысыңыз.

Қосымша 2

1-топ. Жағдаят:

Саят өз ата-анасын басқа балалардың ата-аналарымен көп салыстырады. Кейде Саят өз ата-анасы басқалардікіндей емес сияқты болып, оларға ренішпен қарайтын болды.

- Саяттың іс-әрекеті дұрыс па?

- Саятқа қандай кеңес берер едіңдер?

- Жағдаятты шешу жолын беріңіздер?

2-топ.

Қысқы түн. Үйлердің жарықтары сөнген. Барлығы ұйқыда жатыр. Тек қана мектепте жарық сөнген жоқ. Бұл ұйықтамай отырған біздің мұғалім ғой.

Мен терезе алдында отырмын. Мектептің терезесіндегі жарық сөнгенше күткім келеді. Ұйқы да қысып барады. Ал, мұғалімнің ұйқысы келмей ме екен...?

- Жақындарыңның жақсылығы мен қайырымдылығына қалай жауап беріп жүрсіздер?

- Кейіпкерлердің орнына өздеріңізді қойып көріңіздер, қандай сезімде болдыңыздар?

- Жағдаятты қалай аяқтар едіңіздер?

3-топ.

Қарт атай аулаға алма ағашын отырғызып жатыр. Екі немересі аулада асыр салып ойнап жүр. Атай ағашты отырғызып біткенше маңдайынан шүмектептер ағып, шаршап қалды. Атасы демалуға отырғаны сол еді, үлкен немересі жүгіріп келіп, атасының шаршаңқы жүзіне қарап:

- Ата несіне әуре болдыңыз, сізге оның қажеті қанша, - деді.

- Маған қажет болмағанымен, сендерге қажет, ертең-ақ жемісін жейсіңдер, - деді атасы.

- Жағдаятты аяқтаңыздар.

- Немерелері неге атайға көмек бермеді?

- Балалардың жасы қаншада?

4-топ.

Сыныптағы досыңыздың анасы қатты ауырып қалды, ал сендер болсаңдар қала сыртына саяхатқа билет алып қойғансыңдар.

- Не істер едіңіздер?

- Саяхаттан бас тартасыздар ма?

- Досыңызға қалай көмек ұсынасыздар? Жағдаятты аяқтаңыздар.

Ашық сабақтан көріністер