Сабақ жоспары 7 сынып. Тамырын жайып тереңге

Сабақтың мақсаты: оқушыларға отбасы құндылықтары, ата-баба дәстүрі, ұрпақтар сабақтастығын сүйіспеншілік құндылығы арқылы түсіндіру.

Міндеттері:

• Отбасы құндылығы, отбасы бақыты, ұрпақтар сабақтастығы туралы білім беру;

• Өз туған үйлері мен отбасына деген сүйіспеншіліктерін дамыту;

• Өз туған үйлері мен отбасын құрметтеуге, бағалай білуге тәрбиелеу.

Ресурстар: (құралдар, мәлiметтер)И.Крутой «Мелодия для души» mp3

"Боз орамал" бейнебаян

https://www.youtube.com/watch?v=PY0X3EJaRbA

Сабақтың барысы:

1. Ұйымдастыру кезеңi. Тыныштық сәтi (3 мин)

Тыныштық сәтi. Су асты патшалығына ойша саяхат. (Оқушылардан шеңбер құрып отыруды, қолдарын тізесіне немесе үстел үстіне қоюды, аяқтарын айқастырмауды өтініңіз. Арқаларын тік ұстауын қадағалаңыз. Жайлы, баяу музыка қойыңыз).

Мұғалім: Көзіңізді жұмыңыз және бірнеше рет терең тыныстаңыз. Денеңізді босатыңыз. Бірнеше секундтан соң теңіз түбіне саяхат жасаймыз.

Теңіз жағасымен келе жатқаныңызды елестетіңіз. Толқындардың жеңіл шалпылына, шағалалардың шуылына құлақ түріңіз. Жалаң аяқтарыңызбен құмды сезініңіз. Шалғайдан қара нүкте көріп тұрсыз: ол жақындаған кезде дельфин екенін түсіндіңіз. Ол сізді теңіз түбіне алып кету үшін келді. Ол өте әдепті, сізді шыдамдылықпен күтіп тұр. Жайлап оның арқасына отырыңыз, мықтап ұстап, жолға шығыңыз. Дельфиннің арқасында жайланып отырып, өзіңді қауіпсіз сезіну, су астында жүзу қандай керемет. Жан-жағыңызға қараңыз: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қараңызшы, қандай орасан зор балықтар, ал енді анау жаққа көз тастаңыз... бұл орасан зор сегізаяқ. Су асты неткен қызықты әрі ғажап әлем. Сіз бір нәрсені байқадыңыз ба? Мұнда неткен тұңғиық, толық тыныштық. Осы тыныштық күйде болыңыз.(Мұғалім бірнеше секунд үнсіз қалады).

Ал қазір жоғарыға, өз әлемімізге кері қайтуға дайындалыңыз. Айналаға жіті қараңыз. Ғажап түстерге тағы бір рет қараңыз және тыныштыққа құлақ түріңіз. Осындай тыныштық сізге самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін ризашылық білдіріңіз.

Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз, осы түйсінген тыныштықты өз бойыңызда сақтауға тырысыңыз.

Сабақ барысын талқылау:

2. Дәйексөз (2 мин)

Сабақтың дәйексөзі ретінде М.Әуезовтің «Үлкен алдында жас қарызы, ата алдында бала қарызы – әдеп пен сый» қанатты сөзі қолданылады.

Мұғалім дәйексөздің мағынасын оқушылармен бірге талқылап, мағынасын түсіндіріп береді.

Мұғалім оқушыларға дәйексөздің мағынасын түсіндіреді, туындаған сұрақтарға жауап береді

3. Мұғалімнің сыйы (15 мин)

П.Джонның "Боз орамал" шығармасын бейнебаяннан "Стопкадр" әдісі арқылы жүргізу.

Сұрақтар:

1. Бейнебаянды тамашалағанда қандай сезімде болдыңдар?

2. Жасөспірімнің ата-анасынан қол үзіп кетуінің себебін қалай түсіндірер едіңдер?

3. Оның сағынышының сыры неде?

4. Ата-анасының ұлына деген сезімін сипаттап беріңіздер?

Мұғалім бейнебаян бойынша оқушылардың пікірін тыңдап, қорытындылайды.

4. Шығармашылық, топтық жұмыс (15 мин)

Оқушылар суреттердің көмегімен 4 топқа бөлініп:

1. Отбасы бақыты

2. Отбасы құндылықтары

3. Отбасылық дәстүрлер

4. Отбасымды мақтан етемін...

Тақырыптарында шығармашылық жұмыс жасайды.

Әр топ жұмыстарын таныстырып, мәнін ашады.

Топтық жұмыс

5. Топпен ән айту (3 мин)

Топпен Ш.Қалдаяқовтың "Ана туралы жыр" әнін бейнебаянның көмегімен орындау.

Ш.Қалдаяқов "Ана туралы жыр" мр3

6. Үй тапсырмасы (1 мин)

Оқушы дәптеріндегі тапсырмаларды орындау және "Өз ата-әжелеріңнен ұрпақтарына қалдыратын немесе қалдырған өсиеттері туралы" сұрап, қысқаша шығарма жазып келіңдер.

Оқушы дәптері

7. Соңғы тыныштық сәтi (1 мин) Соңғы тыныштық сәтінде И.Крутойдың «Музыка для души» бейне баянының көмегімен жүргіземіз.