Сабын көпіршіктері

«Сабын көпіршіктері» ұйымдастырылған іс-әрекеті

Жеңісқызы Аяулым, тәрбиеші

Астана қаласы әкімдігінің №81 «Әсемгүл» балабақшасы МКҚК

Білім беру саласы: Таным, Коммуникация, Әлеумет
Тақырыбы: «Сабын көпіршіктері»
Тобы: Ересектер тобы

Мақсаты:

Балаларға сабынның қасиеті, көпіршіктің пайда болу жолы туралы түсінік беру.

Сабынды дұрыс қолдану дағдыларын қалыптастыру.

Гигиеналық тәртіпті сақтауға тәрбиелеу.

Бақылау, ойлау және сөйлеу қабілеттерін дамыту.

Міндеттері:

Сабынның не үшін қолданылатынын түсіндіру.

Сабын көпіршіктерінің қасиетін (жеңіл, мөлдір, ұшқыш) таныстыру.

Сабынмен дұрыс жуыну ретін бекіту.

Тақырып бойынша сөздік қорын кеңейту.

Ұқыптылыққа, тазалыққа, бір-біріне көмектесуге тәрбиелеу.

Заттық дамытушы орта:

Сиқырлы қорапша, аудио жұмбақ, сабын, сүлгі, сабын көпіршіктері, су, стақандар, жуыну жабдықтары, «қоян» кейіпкері, көпіршік жасау құралдары, жанартау тәжірибесіне қажетті заттар (сода, сірке суы, бояу, ыдыс).

Іс-әрекет барысы

I. Ұйымдастыру кезеңі – «Шаттық шеңбер»

Балалар өлең жолдарын айта отырып шеңбер құрады:
Ал, кәнекей, тұрайық,
Үлкен шеңбер құрайық.
Уық болып иіліп,
Керегені құрайық…

II. Қызығушылықты ояту

Тәрбиеші:
– Балалар, жолда келе жатып бір сиқырлы қорапша тауып алдым. Оның ішінде не бар екенін бірге көрейік.

Аудиодан жұмбақ шығады:

Дымқылдап күнде сен,
Қолыңа сүйкейсің.
Кетіп кір, ласың,
Тап-таза боласың. Бұл не?

Балалар: Сабын.

Тәрбиеші сабынның не үшін қолданылатынын сұрайды. Балалар жауап береді.

Тазалық үшін. Жуыну үшін. Қолды таза ұстау үшін.

Тәрбиеші:
– Дұрыс! «Тазалық – денсаулық кепілі».

III. Көрініс – қоян келеді

Жылаған дыбыс естіледі, қоян жылап келеді.

Тәрбиеші:
– Қоян, неге жылап тұрсың?

Қоян:
– Көзімді ашып қарай алмай тұрмын, сабынмен көзімді жуып қойдым…

Тәрбиеші:
– Ой, сен дұрыс жуынбағансың. Сабын көпіршігі көзге тисе ашытады. Жуғанда абай болу керек. Міне, сүлгімен көзіңді сүртіп ал.

Балаларға сұрақ:
– Сабынды қалай қолданамыз?

Балалар ретімен айтады:

Жеңімізді түреміз.

Кранды ашамыз.

Сабынды аламыз.

Қолымызды көпіртіп жуамыз.

Сумен шайып тастаймыз.

Сүлгімен сүртеміз.

Қоян балаларға алғыс айтып шығып кетеді.

IV. Сергіту сәті (музыкамен)

«Көпіршіктер» қимылды биі:
Балалар қолдарын жайып, көпіршік ұшырғандай қимылдар жасайды.

V. Танымдық тәжірибе – «Сабын көпіршіктерін жасау»

Балалар екі топқа бөлінеді, көпіршік жасайды.

Тәрбиеші бағыттайды:
– Көпіршік ауыр ма, жеңіл ме?
– Түсі қандай?
Балалар: Жеңіл, мөлдір, ұшқыш.

Көпіршіктердің қалай пайда болатынын түсіндіреді.

VI. Табиғат құбылысы – шағын эксперимент «Вулкан»

Тәрбиеші:
– Табиғатта да көпіршіктер болады. Жанартаулар атылғанда көбікке ұқсас көпіршіген лава шығады. Көргілерің келе ме?

Қысқа тәжірибе:

Ыдысқа ас содасы салынады.

Қызыл бояу қосылады.

Үстіне сірке суын құйғанда «лава» атқылайды.
Балалар байқайды: көпіршіктену, көтерілу, бұрқ-сұрқ дыбыс.

Тәрбиеші тәжірибені түсіндіреді.

VII. Қорытынды сұрақтар

– Бүгін не туралы білдік?
– Сабын не үшін керек?
– Көпіршіктің қасиеті қандай?
– Жанартауда неге көпіршіктер болады?

Балалар өз ойларымен бөліседі.

КҮТІЛЕТІН НӘТИЖЕ

Біледі:

Сабынның не үшін қолданылатынын;

Сабын көпіршігінің қасиеттерін (жеңіл, мөлдір, ұшқыш);

Жуынудың дұрыс ретін;

Табиғаттағы жанартаудың көпіршіктермен байланысты құбылыс екенін.

Түсінеді:

Тазалықтың денсаулыққа пайдасын;

Көбік пен көпіршіктің қалай пайда болатынын;

Қауіпсіздік ережелерін (көзге тигізбеу, абай болу).

Орындай алады:

Сабынды дұрыс қолдану кезеңдерін ретімен орындайды;

Сабын көпіршігін өздігінен жасай алады;

Тәжірибе кезінде бақылау жасап, қорытынды шығарады;

Жеке және топпен жұмыс жасай алады.