Астана қаласы №68 орта мектеп Сулеева С.З.

Тақырыбы: Сәлем, ғажайып әлем! ( әдеби- сазды кеш.)

Мақсаты:

Рухани - адамгершілік құндылықтарға негізделген ойы, сөзі, ісі бірлікте өмір сүретін, тұлғаны қалыптастыру.

Міндеттері:

• әлем ғажайыптары арқылы дүниетанымдарын кеңейту.

• жалпыадамзаттық құндылықтырының мәнін ашу.

Ресурстар: плакаттар, слайд, бейне көрініс.

Сәлем, ғажайып әлем!

«Еліміздің ертеңі бүгінгі жас ұрпақтың қолында,

ал жас ұрпақтың тағдыры –ұстаздың қолында.»

Н.Ә.Назарбаев

ӨТІЛУ БАРЫСЫ:

Жүргізуші:

-Құрметті қонақтар, ұстаздар, ата-аналар, оқушылар!

«Сәлем, ғажайып әлем!» фестиваліне қош келдіңіздер!

- Әлемдегі ең аяулы адам - ол ана! Ана бір қолымен бесікті тербетсе, екінші қолымен әлемді тербеткен-жан! Елдің анасы, «Өзін-өзі танудың» авторы- Сара Алпысқызы да - «Бөбектердің» анасы.

«Бөбектердің анасы» сөзі: С.Сулеева

1-оқушы:

Бар бала жүрегінен орын алған,

Сәби жүрек бөбекке пана болған.

Құндылықты баршаға тиек еткен,

Кең жүректі, кең пейіл қандай адам?

2- оқушы

Бір өзіңсің бар баланың анасы,

Бөбектердің арқа сүйер панасы.

Бір жүрекке бар баланы сыйғызған,

Сара апамыз-аналардың анасы.

3-оқушы

Авторысыз «өзін-өзі танудың»,

Бағыт берген жолын өмір танудың.

Тіледіңіз бөбектердің бойына,

Құндылықтың құнды болып даруын.

4- оқушы

Ана ғана шын ұғынған жаныңды,

Ана берген жүректерге жалынды.

Жадыратса жаздай етіп жаныңды,

Аналардан аямаңдар барыңды.

5-оқушы

Ұзақ өмір жасай берсін аналар,

Аналарын қадірлесін балалар.

Шаңыраққа шаттық нұрын сыйлаған,

Аман болсын ақ жаулықты аналар.

Би «Бүлдіршіндер биі.»

Жүргізуші:

-Әлемдегі бір ғажайып ол – табиғат. Табиғатсыз адамдардың күні жоқ, оны айтатын табиғаттың тілі жоқ. Сұлулық сыйлаған, әдемілікке толы жердің, табиғаттың тұнық ауасын, тауын, суын, сұлулығын неге айтып тебіренбеске...

«Табиғат әлемі.» сөзі: С. Сулеева

1-оқушы

Болдың ба сен?

«Жасыбай» баурайында.

Көрдің бе сен?

«Жасыбай» тауларын да.

2-оқушы

Жүздің бе сен?

«Торайғыр» көлдерінде.

Суы тұнық, мөп-мөлдір, бір ерекше,

Ағаш өскен таулардың белдерінде.

3-оқушы

Сипаттауға табиғатын жерімнің,

Сөз жетпейді суреттеуге тілімнің.

Бір ерекше табиғат, тылсымы көп,

Табиғаты ерекше бұл елімнің.

4-оқушы

Сол жерлерді көрейік, бағалайық,

Әрбір тасын бағалап, аялайық.

Табиғаттың сұлу бір тамашасын,

Қадірлейік, қамқорлықты аямайық.

Ән: «Ертегілер әлемі»

Жүргізуші:

Әлемдегі мекенімнің ертеңі,

Астана - бұл ғажайып ертегі.

Елі жайлы, жері жайлы әлемнің.

Ұландары көңілден күй шертеді.

«Астана әлемі.» сөзі: С. Сулеева

1-оқушы

20 жасқа толды менің-Астанам,

Нұрлана бер, нұрлы әлемде жас қалам.

Таңғажайып әлеміңмен шаттанып,

Көркейе бер, гүлдене бер, Астанам.

2-оқушы

Көріктісің, көз жүгіртсем қырыңа,

Үңілемін әр саясат сырыңа.

Сыртқы бейнең ертегідей көрінер,

Қиялменен сырт қараған ұғымға.

3-оқушы

Шырқалсыншы әлемдерге жыр-әнің,

Құлпырсыншы бөбектермен сән- сәнің.

Бәсекеге қабілетті қала бол,

Сол емеспе әлемдегі зор мәнің.

Ән «Көк тудың желбірегені» сөзі: И. Ескендір

Жүргізуші:

Сан ғажайыпқа толы әлемнің қыр-сырын жырлап, әлемге жүректеріңді ашқан «Сәлем, ғажайып әлем!» іс-шарамызды аяқтаймыз.