Сабақтың тақырыбы: Саптық дайындық. Қозғалыста бұрылулар

Сабақтың мақсаты:

1. Білімділік: Оқушыларды қозғалыста бұрылулар жасауға үйрету.

2. Дамытушылық: Оқушылардың тақырыпқа деген танымдық қабілетін арттыру, дамыту.

3. Тәрбиелік: Әскери істі оқып үйренуде болашақ сарбаздардың әскери қызметке деген қызығушылығын арттыру.

Уақыты: 45 минут.

Өткізілетін орны: Саптық алаң

Сабақтың түрі: Жаңа сабақ

Сабақтың әдісі: Түсіндіру, көрсету, топпен, жеке жұмыс жасау

Сабақтың барысы:

а) Ұйымдастыру кезеңі

Бөлімше командирі оқушыларды сапқа тұрғызады, әскери жетекшіге мәлімдеме береді, амандасу, түгендеу, оқушылардың сырт көрінісін тексеру.

ә) Өтілген тақырыпты сұрау кезеңі

— Саптық тұрысты орындау үшін қандай командалар беріледі?

— Сарбаздың сапқа тұрар алдындағы және саптағы міндеттері қандай?

— Саптық және жорықтық адым қай кезде қолданылады?

— «Саптық адыммен – БАС» команда бойынша жаттығу қалай орындалады?

б) Негізгі бөлім

Қозғалыста бұрылулар

Қозғалыста бұрылулар мынадай командалар бойынша орындалады: «Оң-ҒА», «Сол-ҒА», «Артқа бұрыла — БАС».

Оңға (солға) бұрылу үшін орындалатын команда оң (сол) аяқты жерге қоюмен бір уақытта беріледі. Осы команда бойынша сол (оң) аяқпен бір адым жасап, сол (оң) аяқтың ұшымен бұрылу керек, бұрылумен бір уақытта оң (сол) аяқты алға созу және қозғалысты жаңа бағытта жалғастыру керек.

Артқа бұрылу үшін орындалатын команда оң аяқты жерге қоюмен бір уақытта беріледі, осы команда бойынша сол аяқпен тағы бір адым жасап, оң аяқты алға қарай жарты адым шығару және біршама солға, сол қол жаққа қарай екі аяқтың ұшымен шұғыл бұрыла отырып, қозғалысты сол аяқпен кері бағытта жалғастыру керек.

Бұрылулар кезінде қолмен қозғалыс адым ырғағымен жасалады.

Бірінші кезекте әскери жетекші қозғалыстағы бұрылуларды тұтас орындап жаттығушыларға түсіндіріп алғашқы даярлық жаттығу — оңға бұрылуды үшке бөліп, “Жаса-БІР!”,”Жаса-ЕКІ!”,”Жаса-ҮШ!” командаларды беру керек.

“Жаса-БІР!” команда бойынша сол аяқпен бір адым жасап, қолдармен қозғалыс жасап, сол аяқпен тұру керек. “Жаса-ЕКІ!” дегенде сол аяқтың ұшымен бұрылып, оң аяқпен алға созу қозғалысын жаңа бағытта жалғастыру керек.”Жаса-ҮШ” саны бойынша сол аяқты оң аяққа қою керек.

Солға бұрылуды, төрт адыммен жасау керек, оң аяқтың ұшымен бұрылу керек.

Артқа бұрылуды төрт санға бөліп үйреткен дұрыс.

“Жаса-БІР!” команда бойынша оқушылар сол аяқпен бір адым жасайды, “Жаса-ЕКІ!” дегенде оң аяқты алға қарай жарты адым созу керек және біршама солға және сол жаққа қарай екі аяқтың ұшымен шұғыл бұрылуы керек.

“Жаса-ҮШ!” пәрмені бойынша қозғалысты сол аяқпен жаңа бағыт бойынша жалғастыру керек. “Жаса-Төрт!” дегенде оң аяқты қосу керек.

Жаттығу кезінде оқушылардың шұғыл бұрылуына және қол қимылдарының орындалуына баса назар аудару керек.

Бірінші даярлық жаттығуды меңгергеннен кейін оқушыларға жаттығуларды өз беттермен жаттығуға команда беріледі. Ал әскери жетекші сырттарынан бақылау жасай отырып, қате жіберген оқушыларға қателерін түзетуге көмектеседі.

Бұдан кейін жаттығушылар бір- бірден саптық алаңның периметрі бойынша оңға және солға бұрылуларды жасайды. Осылай бірнеше рет қайталана отырып әскери жетекші қателерді түзетіп отырады.

Жаттығушылар екі топқа бөлініп саптық алаңда қарама-қарсы қатарларға тұрады. «Саптық адыммен – БАС» команда бойынша алға қозғалады және бір біреуне жақындағанда (3-4 метр ) артқа бұрылып өз орындарына тұрады. Осылай бірнеше рет қайталанады.

Соңынан әскери жетекші оқушыларды екіден, төрттен саптан шығарып «Оң-ҒА», «Сол-ҒА», «Артқа бұрыла — БАС» командалар бойынша жаттығуларды жасатады.

в) Қорытынды бөлім

Жаңа тақырыпқа байланысты қойылған сұрақтарға жауап қайтару,жіберілген қателерге талдау жасау, оқушылардың білімін бағалау, сабақ тақырыбына байланысты үйге тапсырма беріледі.