Сенімсіз қоғам - болашағы бұлыңғыр

Қазіргі әлем қарқыны қатты. Ақпарат күн сайын емес, сағат сайын жаңарады.

Адамдар бір-бірімен жиі байланыс орнатқанымен, бір-біріне деген сенімі әлсіреп бара жатқандай. Бүгінгі қоғамда адам сөзіне, уәдесіне, тіпті шынайылығына күмәнмен қарау қалыпты жағдайға айналды. Осындай кезеңде «қазіргі әлемде сенім бар ма?» деген сұрақтың туындауы заңды.

Оның үстіне, соңғы жылдардағы жаһандық өзгерістер — індеттер, қақтығыстар, экономикалық тұрақсыздық — адамдардың бір-біріне ғана емес, ертеңгі күнге деген сенімін де әлсіретті. Белгісіздік күшейген сайын, адам сақтыққа көшеді, ал сақтық көбіне сенімсіздікке ұласады. Осы жағдайда сенім тек жеке сезім емес, қоғамның тұрақтылығын ұстап тұрған маңызды тірекке айналып отыр.

Сенімнің әлсіреуіне бірнеше себеп бар. Біріншіден, әлеуметтік желілерде жасанды бейнелер мен жалған ақпараттың көбеюі адамдардың бір-біріне деген күдігін арттырды. Екіншіден, уәде беріп, бірақ орындамайтын жағдайлар жиі кездеседі. Бұл жеке қарым-қатынаста ғана емес, қоғам мен азамат арасындағы байланыста да байқалады. Үшіншіден, материалдық құндылықтардың рухани құндылықтардан жоғары қойылуы сенімнің орнын пайдакүнемдікпен алмастырды.

Сенімнің әлсіреуі әсіресе жастар арасында анық байқалады. Көпшілігі болашаққа жоспар құрудан қорқады, себебі тұрақтылыққа сенбейді. Бұл тек әлеуметтік немесе экономикалық мәселе емес, бұл — рухани дағдарыс. Адам сенбеген жерде жауапкершіліктен де қашады, ал жауапкершілік жоқ қоғамда даму баяулайды.

Сонымен қатар, сенімнің орнын бақылау мен күдік басып келеді. Қоғамда ереже көбейгенімен, адамгершілік азайып бара жатқандай әсер қалдырады. Алайда сенім тек қатаң заңмен емес, өзара құрметпен, ашықтықпен қалыптасады. Бір-бірін тыңдай білетін, қателікті мойындай алатын қоғамда ғана сенім қайта жанданады.

Менің ойымша, қазіргі әлемде сенім бар, бірақ ол бұрынғыдан да қымбат әрі жауапты ұғымға айналды. Сенім — жүйеден немесе заңнан емес, әр адамның өзінен басталады. Өз сөзіне жауап беру, уәдеде тұру, біреудің сенімін ақтау — бүгінгі қоғамдағы ең үлкен адамгершілік өлшем. Егер әр адам сенімді алдымен өз жүрегінде сақтай алса, онда қоғамда да сенім жоғалмайды.

Нақтылай келе сенімсіз қоғам — болашағы бұлыңғыр

Оны әркім өзінен бастап, қоршаған ортасына тарата білсе, әлем де сеніммен жаңарады.

Аида БАЙЖАНҚЫЗЫ

Қ.Топаев атындағы жалпы білім беретін мектебінің 11-сынып оқушысы