Сиқырлы күз

Білім беру саласы: Шығармашылық. Коммуникация.

Кіріктірілген оқу қызметі: Сурет салу, тіл дамыту, музыка.

Тақырыбы: «Сиқырлы күз»

Мақсаты:

1.Балалардың күз туралы білімдерін толықтыру.Күзгі ағаштың бейнесін дәстүрден тыс әдісімен салуды үйрету.

2.Қиялдарын,эстетикалық тәрбиелерін дамыту.

3.Эмоциялық сезімдерін қалыптастыра отырып, табиғатқа деген сүйіспеншілікке тәрбиелеу.

Көрнекіліктер: Слайд,үлгі сурет,күзгі ағаштың суреті,жапырақтар,мақталы таяқша,салфетка,акварель бояуы.

Ұйымдастыру кезеңі: Жылулық шеңбері

Ауадан қуат алайық,

Алақанға салайық

Жерден нәр алайық

Алақанға салайық

Күннен шуақ алайық

Алақанға салайық

Күн шуағын балаларға сыйлайық!

-Қазір жылдың қай мезгілі?

-Қазір жылдың күз мезгілі.Күз мезгілінде күн суытады,айналадағы шөптер қурап,сарғайып , жапырақтар жерге түседі,жауын жауады.Құстар жылы жаққа ұшып кетеді.

Билингвальды компонент: Күз-осень-autumn.

Тиін мұңайып кіреді.(жылап)

-Тиін ,тиін саған не болды?

-Сиқырлы күз менің ағашымды сиқырлап тастады.

-Не үшін сиқырлы күз сенің ағашыңды сиқырлап тастады?

-Бұзық болғаным үшін ,ағашыма ұқыпты қарамадым. Енді өз ағашымды таба алмай қалдым(жылайды).

-Жылама,Тиін, біз саған көмектесеміз.

-Балалар, тиін ағаштан –ағашқа секіріп жүретін жануар.Күзде өзіне жаңғақтар,саңырауқұлақтар жинап алады,қысқа дайындалады.Ағаштардың адамдарға пайдасы көп балалар. «Бір тал кессең – он тал ек» деген мақалды жаттап алайық.Балалар ағаштардың пайдасы туралы ойларын айтып өтеді.

-Тиін сен бізге өз ағашыңа ұқыпты қараймын деп уәде бер.

-Иә,иә мен уәде беремін,енді олай жасамаймын, ағашыма ұқыпты қараймын.

-Жарайды, тиін, ендеше біз балалармен бірге сиқырлы күздің ағаштарының суретін салып берейік.Сонда сиқырлы күз мейірленіп, саған сенің ағашыңды қайтарып береді.

-Енді, балалар,мына тақтаға қарайықшы.Ағаштар ерекше тәсілдермен орындалған.Ағаштың нелері болады?

-Ағаштың қатты бөлігі діңі,бұтақтары, жапырақтары болады.Ағаштың діңін губкамен қоңыр түске малып,бастырып орындаймыз.Бұтақтарын мақталы таяқшамен қоңыр түспен орындаймыз.Жапырақтарын қызғылт-сары түстерді араластыра отырып табиғи жапыраққа бояу жағып,оны бастыра отырып орындаймыз.

Балалар сазды әуенмен жұмысқа кіріседі.Балаларды үш топқа бөліп жұмысты орындату.

Музыкалық сергіту сәті.

«Күз Жомарт» әнін қимыл-қозғалыспен орындау.

-Ал енді,балалар, жұмыс орнымызға отырып, жұмысты жалғастырайық.Әр топ жұмысын аяқтап болған соң өз жұмыс орындарын реттейді.

Ойын «Ұқсас жапырақты тап».

Шарты: тақтада ілінген бірдей жапырақты тауып ағашқа ілу.

-Балалар, бүгін біз қандай жұмыс жасадық?

- Біз тиінге көмектестік, ағаштың суретін губкамен,таяқшамен,жапырақпен салуды үйрендік.

Тиін: -Балалар,сендерге көп рахмет,менің ағашымды тауып алуыма көмектестіңдер.Ағаштардай жайнап өсіп, өне беріңдер!Сау болыңдар!

-Балалар,жарайсыңдар! Сендер бір үлкен іс істедіңдер.Тиінге көмектестіңдер.Жүректерің мейірімге толы болсын!Ерекше ықыласпен қатысқан балаларды мақтап,мадақтау.