Сөз өнерінің құдіреті

Бұл дүниеде сөзден асқан құдірет жоқ. Ал, сөз құдіреті деген не? Меніңше, ол - ақылға қозғау бола алатын, ойың мен сезіміңді жеткізетін киелі өнер, өмірдегі болып жатқан оқиғаларды қағазға нақты түсіріп, жан-жағындағы адамдармен тіл табысып, пікір алмастыратын көрікті де әсерлі ұғым, жүрегіңе әсер қалдыратын мағыналы, түйінді сөз. Міне, сөздің құдіреті дегеніміз осы. От тілді бабаларымыз өнердің осы түріне ерекше мән беріп, тізгінін келешек ұрпаққа ұстатты. Себебі, сөз – ол бір әлем, біздің болашағымыз. Сөздің қасиеттілігі сонша, сонау заманнан бергі халқымыздың асыл қазынасын: тарихын, өнерін, жырларын, әдебиетін ауыздан-ауызға таратып, қазіргі уақытқа дейін бізге мұра ретінде жеткізіп отырған. Осыдан-ақ сөз өнерінің ғажайып тылсым күшке ие екенін көруге болады.

Қазақ халқы ежелден-ақ сөздің қастерлі, қасиетті екенін танып білген. Бір ауыз сөзбен үлкен дауларды тоқтатып, шешімін де шығарған, сөзге берік болған. «Сөз сүйектен өтеді - таяқ еттен өтеді» демекші, бір ауыз сөзбен кеселді жазып, бір ғана сөзбен жаныңа жара салуға болады. Сөздің алмайтын қамалы жоқ екеніне осы тұстан да байқай аламыз.

Ендеше, біздің осындай асыл қазынамыз сөзді сақтау, оны қадірлеу, орнымен сөйлеу, қадірін білу қазіргі және кейінгі ұрпақтардың мәңгілік міндеті мен парызы деп білемін.