Сынып сағаты. "Мен патриотпын"

Тақырыбы: Мен – потриотпын!

Мақсаты:

Қоғамда өздерін көрсетіп және өз еліне пайдалы бола алатын, Жаңа Қазақстандық Патриотының құндылықтары мен мұраттары жүйесін иеленетін білім алушы – патриот тәрбиелеу.

Көрнекілігі: суреттер, нақыл сөздер, слайдтар

Барысы:

Ұйымдастыру.

Аспаны ашық еліміздің,

Көркі сұлу жеріміздің,

Біз - бақытты баламыз!

Ақпыз, қара, сарымыз,

Ағайынбыз бәріміз!

Мұғалімнің кіріспе сөзі:

Бүгін біздің өтетін сабағымыздың тақырыбы: «Мен өз елімнің патриотымын.» Балалар, сіздер алдымен «патриот» деген кім, ол қандай адам деген сұраққа жауап беріп, өз ойларыңды еркін жеткізіңдер.

Патриот – ұлтын сүйетін, өз тарихын, туған тілін құрметтейтін, ұрпақтан ұрпаққа жалғасқан салт – дәстүрін дәріптейтін, ұлттық қадір – қасиетімізді арттыруға үлес қосатын саналы тұлға. Туған елі үшін үнемі тер төге қызмет етіп, халқымыздың мол рухани құндылықтарын бағалай білетін асыл тұлға.

Яғни, Патриот – отаншыл, отансүйгіш.

Отанның мерейін үстем ету жолында, өз халқына деген сүйіспеншілігін, қолда барын, өмірін аямайтын адам.

- Отан деген не? Кім қалай түсінеді?

(Оқушылар өз ойларын айтады)

Топтық жұмыс. (Түрлі-түсті текшелер бойынша топқа бөлу.)

І топ: Қызыл: Т У Ғ А Н (Отан туралы сурет салу)

ІІ топ: Көк: Ж Е Р І М (Мақал-мәтел айту, жазу)

ІІІ топ: Жасыл: О Т А Н Ы М («Менің Отаным – Қазақстан» мәтін құрау)

Әр топ қорғайды. Бірін-бірі басбармақ бойынша бағалайды.

Отан – әр адамның жүрегіне жылы тиер қасиетті сөз. Отан – сенің туған елің, туған жерің, дос – жарандарың, туған - туысқаның. Отан – бұл өзіңнің тұратын, өмір сүретін, қызмет ететін жерің. Отан адам үшін біреу ғана. Отанды анаға теңейді. Себебі, Отан сендерді анаңдай қорғайды, көмектеседі, күш береді. Біз Отанымызды, елімізді сүйеміз. Біз, Қазақстанның патриотымыз!

Отан дейміз кең - байтақ астананы,

Жасыл жайлау, жаңа жол, жас қаланы.

Отанның шеті де жоқ, шегі де жоқ,

Ол бірақ өз үйіңнен басталады.

- Біздің Отанымыз қалай аталады?

- Қазақстан Республикасы қандай мемлекет?

- Қазақстан Республикасының президенті кім?

- Президент деген кім?

Біздің еліміздің президенті Нұрсұлтан Әбішұлы Назарбаев. Ал біздің Отанымыз – Қазақстан Республикасы. Сан ғасырлар бойы ата - бабаларымыз жерін жаудан қорғап, бүгінгі ұрпақ, бізге жеткізді. Қазақстан жер көлемі бойынша 9 орында тұр. Қазақстанда үлкен қалалар көп. Олар: Алматы, Астана, Қарағанды, Шымкент, Көкшетау, Қостанай, Ақтау, Павлодар, Ақтөбе, Тараз, Қызылорда, Өскемен, Семей, Талдықорған. Бұлар – әдемі қалалар. Аталған қалаларда қазақтар, орыстар, ұйғырлар, өзбектер, кәрістер, украйндер және тағы басқа ұлттардың өкілдері тұрады. Олар тату - тәтті, бірлікте өмір сүріп жатыр.

Астана - Отанымыздың бас қаласы, астанасы. Ол Есіл өзенінің жағасында орналасқан. Астана қаласын қазір бүкіл ел біледі. Астанада биіктігі 97 метрлік не бар? (Бәйтерек)

-Бәйтеректі көргендерің, Астанаға барғандарың бар ма?

-Биыл Астанада қандай тарихи оқиға болды? Ол туралы не білесіңдер? (оқушылардың ойын тыңдау, «ЕХРО 2017» слайдтар көрсету).

1992 жылы ҚР мемлекеттік рәміздері қабылданды. Олар: ту, елтаңба, гимн. Қазақстан Республикасының мемлекеттік Туы. Ортасында шұғылалы күн, оның астында қалықтап ұшқан қыран бейнеленген тік бұрышты көгілдір түсті мата. Алтын күн, қыран және ою - өрнек біздің халқымыздың ашық келешегі мен берекесі, тыныштық пен байлықтың белгісі.

Көк аспандай көкпеңбек,

Қазақстан жалауы.

Көк емес ол тектен - тек,

Елдің ашық аспаны.

Қазақстан Республикасының мемлекеттік Елтаңбасында көгілдір түс аясында шаңырақ бейнеленген. Шаңырақты айнала күн сәулесіндей тарап, уықтар шаншылған. Бес жұлдыз, қанатты тұлпар бейнеленген. Бидай сабақтары тоқшылық, молшылықты білдіреді.

Елтаңбасы елімнің,

Неткен әйбәт, әдемі

Тұнығындай көңілдің

Ортада аспан әлемі.

Кез - келген мемлекеттік рәміздердің ең маңыздысы - Гимн. Гимн мемлекеттік ән. Ол халықты әйгілі етеді. Оның сөздерінде халықтың мыңдаған жылғы тарихы, бүгінгі өмірі мен келешек арманы айтылған.

Оттай жанып жанарың

Одан қуат аламын

Әнұран ол — тынысы

Кең жазира даламның.

Міне, осы Қазақстандай үлкен жерімізді, елімізді, танытып, намысымызды шет елде қорғап келген азаматтарымыз, өз елінің патриот азаматы ретінде көк туымызды көкке желбіреткен отандастарымызға мың алғыс.

-Балалар сендер өз елінің патриотына айналған, бүгінде елінің намысын қоғап жүрген кімдерді білесіңдер?

Оқушылар өз ойларын айтады.

Келешекте сендер де осындай адамдардай болып, өз елінің патриоты болуларыңа тырысуларың керек.

Мұғалім:

-Ия, балалар, елін, жерін сүйетін азамат болып шығу үшін қандай бала болуымыз керек?

-Білімді, өнерлі, ақылды, еңбексүйгіш бала болуымыз керек.

Қорытынды: Сабағымызды жақсы оқып, еліміздің адал, еңбекқор азаматы болайық. Ер жетіп еліміздің одан әрі көркеюіне, гүлденуіне өз үлесімізді қосайық.

Сондай-ақ, еліміздің егемендігін танытатын ресми ерекшелік белгілері: Ана тіліміз, Елтаңбамыз, Туымыз, Ата заңымыз, Әнұранымызды бойындағы бойтұмарындай сақтап қана қоймай, қашанда еліміздің, жеріміздің еркіндігін сақтар мықты ұрпақ, мықты азамат болатындарыңа сенімім мол.

Хормен оқу:

“Қазақстан – менің Отаным, ол мен үшін жауапты болғаны сияқты, мен де ол үшін жауаптымын ”, “ Өз Отанының патриоты болу – Қазақстанды өз жүрегінде ұялату ”

«Мен кім болам?» тақырыбында стикерлерге өз ойларын жазады.

«Рефлексиялық шеңбер» Оқушылар шеңберге тұрып, төмендегі сұрақтарға жауап береді.

• Сабақ барысында көңіл-күйіңіз қандай болды? Неліктен?

• Бүгін не білдіңіз? Сіз үшін не жаңалық болды?

• Сабаққа қатысуыңызды қалай бағалайсыз?

• Сабақта қандай қиындықтар туындады?

• Сабақ аяқталғанда көңіл-күйіңіз қандай? Неліктен?