Сыныптан тыс шаралар

Тазалық-денсаулық кепілі

Денсаулық – адамның баға жетпес басты байлығы. Әрбір адам өз денсаулығының мықты болу жолдарын қарастыру керек. Дені сау адамның көңіл-күйі көтеріңкі болып, еңбекке әрқашан құлшына кіріседі. Халқымыз «Дені саудың – жаны сау» деп орынды айтқан. Отанымыздың келешегі, көркеюі – салауатты өмір салтын сақтауда деп ойлаймын. Біздің де өмірімізді жарық қылатын, өмірдегі басты байлық – денсаулық. Денсаулық – бұл адамның еңбекке белсенді болуы, әрі ұзақ өмір сүруі, тәннің саулығын және рухани саулығын сезіну.

Мені ата-анам жеке бас тазалығының ережелерін сақтауға кішкентай кезімнен баулыды. Күнделікті бір уақытта тұрып, шынықтыру жаттығуын жасаймын.Таңертең және ұйықтар алдында тісімді тазалап, беті-қолымды, мойным мен құлағымды жуып, бөлмемді желдетіп аламын. Тамақ ішердің алдында, мектептен келгенде, ойыннан кейін, әжетханадан соң міндетті түрде қолымды сабынмен жуып отырамын. Анам мұрнымның әрқашан таза болуына аса көңіл бөлуді талап етеді. Мектепке киетін киімім мен үй киімімді ұқыпты ұстап, уақытылы ауыстырамын. Өз бөлмемнің тазалығын қадағалап, шаңын жиі сүртіп отыруға тырысамын. Күнделікті ыстық сумен және сабынмен жуынып, теріні түрлі микробтар мен лас нәрселерден айықтырып, тазартып отырамын. 

Еліміз көркейіп, өсіп-өну үшін жас ұрпақтың дені сау болуы қажет. Сондықтан, кішкентай кезімізден бастап ата-анамыздан тазалық сақтауды үйреніп, өз денсаулығымызды көзіміздің қарашындай сақтағанымыз дұрыс деп ойлаймын.

Қайырғазы Санжар 4-сынып оқушысы