Сыныптастар

Қанша жыл өтседе,ескірмейтін достық!

Сыныптастар… Бұл сөзді естігенде әркімнің жүрегінде ерекше сезім оянады. Көз алдымызға мектеп дәліздері, шуақты күндер мен балалық шақтың тәтті естеліктері келеді. Өмірдің ең қамсыз, ең риясыз кезеңі – мектеп жылдары. Ал сол жылдардың ең қымбат куәгерлері- сыныптастар. Сыныптастар – бала қиялдың серігі, ортақ естеліктердің авторы. Бірге жүгіріп, бірге құлап, қайта тұрып, күле жүріп өсу. Бір-бірімізге алғаш сенім арттық, бірге армандадық, болашаққа бірге жоспар құрдық. Әрқайсымыз түрлі мінезді болсақ та, бір партада отырып, бір сабақтан бірге қиналдық, алғашқы қуаныштар мен жеңістерді де бірге бөлістік.

Бәлкім, уақыт өте бәріміз өмірдің сан қилы жолына түсерміз. Бір-бірімізді сирек көретін шығармыз. Бірақ қанша жыл өтсе де, мектеп қабырғасында бірге күліп, бірге ойнап, бірге қиялдаған сәттер жүректің бір түкпірінде мәңгі сақталады. Өйткені сыныптастар – тек мектепте бірге оқыған жандар емес, олар – балалық шақтың ең жарқын бояуы, ең шынайы достар.

Өмірімде сыныптастардан жолым болғанына қуанамын! Қазіргі таңда мектептік өмір біз үшін ең ыстық сәттер болу да,әр минут,секунд 11ші сыныптар үшін бағалы болуда.Сыныптастармен өткізген әрбір күн – кітаптың сарғайған беттеріндей, қайталанбас сәттердің куәсі. Соңғы қоңырау сыңғыры, мектеп формасына жазылған жылы тілектер, ұстаздың мейірімді даусы – бәрі де жүрек түбінде сақталып, жылдар өте сағынышқа айналады.

Сыныбым 11 “Ә” – жай ғана сынып емес, бұл – бір отбасы. Біз тек қатар отырып сабақ оқып қана қоймадық, бірге қуанып, бірге мұңайып, бірге жетілдік. Біріміз – көшбасшы, біріміз – әзілқой, енді біріміз – шығармашыл, ал біріміз – ұстамды. Әртүрлі болсақ та, бір-бірімізді толықтырып, біртұтас әлемге айналдық.

“Жолдасы жақсының – өзі де жақсы,” – дейді халық даналығы. Біз өмір жолында ең алғашқы шынайы достарымызды дәл осы сыныпта таптық. Сабақтан кейінгі шексіз әңгімелер, қызықты оқиғалар, дайындалмаған үй тапсырмалары үшін жаппай сылтау іздеген күндер – бәрі де енді сағынышқа айналмақ.

Біздің ең үлкен құндылығымыз – бірлігіміз. Бірге өткізген мектеп жылдары – біздің болашаққа деген берік негізіміз. Алда үлкен сынақтар күтіп тұр, бірақ біз кез келген қиындықты еңсере аламыз. Өйткені біз – 11 “Ә”, біз – бір жүрекпіз!

Ертеңіміз қандай болатынын білмейміз, бірақ өткенімізде сыныптастар бар екені анық. Олар – достықтың бастауы, ең таза естеліктердің аманатшысы.

Ғаниқызы Ақерке