Тәрбие тал бесіктен басталады

Тәрбие – тал бесіктен басталады

Қазақ халқы ежелден бала тәрбиесіне ерекше мән берген. «Тәрбие – тал бесіктен басталады» деген нақыл сөздің өзі ұрпақ тәрбиесінің ең алғашқы сәттен, яғни дүниеге келген күннен басталатынын аңғартады. Баланың болашақтағы мінез-құлқы, адамгершілігі, еңбекқорлығы мен елге деген сүйіспеншілігі ең алдымен отбасында қалыптасады. Ең бірінші бала тәрбиені отбасынан алады.

Отбасы – баланың алғашқы мектебі. Анасының әлдиі, әкесінің ақылы, ата-әженің өнегелі әңгімесі баланың жүрегіне мейірім мен ізгіліктің дәнін себеді. Үлкенді сыйлау, кішіге қамқор болу, адалдық пен жауапкершілік сияқты қасиеттер бала бойына күнделікті тұрмыста, ата-ананың іс-әрекеті арқылы сіңеді. Сондықтан ата-ананың әрбір сөзі мен ісі – бала үшін үлгі. Мен үшін де ата-анамның орны ерекше.

Тәрбие тек үймен шектелмейді. Мектеп – баланың тұлға болып қалыптасуындағы маңызды орта. Мұғалімнің берген білімі мен тәрбиесі оқушының дүниетанымын кеңейтіп, дұрыс жол таңдауына ықпал етеді. Сыныптастарымен қарым-қатынас жасау арқылы бала өз ойын еркін айтуға, бірін-бірі сыйлауға, ұйымшыл болуға үйренеді.

Қазіргі заманда тәрбие беру мәселесі бұрынғыдан да маңызды. Ақпараттың көптігі, түрлі технологиялар баланың санасына әсер етеді. Осындай кезеңде ұлттық құндылықтарды сақтай отырып, балаға дұрыс бағыт-бағдар беру – ата-ана мен мұғалімнің ортақ міндеті.

Қорытындылай келе, тәрбиелі ұрпақ – елдің болашағы. Баланы кішкентайынан дұрыс тәрбиелеп, жақсы қасиеттерге баули білсек, ертеңгі күні саналы, білімді, елін сүйетін азамат өсіп шығады. Сондықтан да «Тәрбие – тал бесіктен басталады» деген сөз ешқашан маңызын жоймайды. Жоймақ та емес. Әрбір балаға біздіңде аз да болса үлесіміз тисе екен.