"Тарихи тұлғалар" факультатив сабақ жоспары

8 «а», «б»-сыныптар

Пән мұғалімі: Омарова Айгуль Саденбаевна

Бекітемін: Тексерілді:

Бағдарлама құрылымы:

1. Түсінік хат

2. Курс мақсаты мен міндеттері

3. Күнтізбелік жоспар

4. Пайдаланылған әдебиеттер

Түсінік хат:

Курс Қазақстан тарихының жаңа заман кезеңінің тұлғаларына арналған. Аталмыш кезең - тарихи тұлға мен қоғам арасындағы және осы бір қайшылықты замандағы түрлі этникалық топтардың қалыптасуы мен тағдырының, өзара күрделі байланыстарының көрінісі, көшпелі мемлекеттердің көрші империялардың үлкен саясатының кұрбаны болғанының куәгері. Бұл кезең ұлттық мемлекетіміздің дамуы мен кейіннен дербестігінен айрылып отарлану проблемаларын оқушылардың айқын тануына мүмкіндік береді.

Бағдарламада қазақ халқынының тағдырының көрші елдер тарихының проблемаларымен сабақтастығы негізделеді. Соның ішінде Қазақ хандығы мен Жоңғар хандығы арасындағы тартысты катынастар, қазақ халқының жоңғар басқыншылығына қарсы Отан соғысының негізгі шайқастары жаңа зерттеулердегі фактілік материалдар мен жаңаша пайымдауларға сүйеніп беріледі. Отаршылдыққа қарсы ұлт-азаттық қозғалыстарының дамуы және осы шапқыншылық пен ұлта-азаттық көтерілістердегі батырларымыздың рөлі көрсетіледі.

Тұлғаларсыз тарихтың шығыршығы айналмайды. Ұлы тұлғалар өмірі – ұрпаққа өнеге, ұлтқа мақтан боларлық ғибрат. Қазақ халқы тарихи этнос ретінде қалыптасқан уақыттан бастап еңселі ел болуды қашанда армандап, мақсат тұтқан халық. Осы мақсат жолында қазақтың талай арыстары өздерінің өмірін арман жолына сарп еткенін тарихтан білеміз. Біз тарихтан дарынды жеке тұлғалардың елдің тарихын түбегейлі өзгертудегі рөлін жақсы білеміз.

Тарих тарихи тұрғыдан ойлай білуді қалыптастырады, азаматтық ұстанымды шыңдай түседі, ұлттық мақтаныш пен патриоттық сезімге тәрбиелейді. Өткенімізді біле отырып, қазіргі кезеңді оңай меңгереміз, болашақты айқындай аламыз.

Курс мақсаты мен міндеттері:

- Халқымыздың жоңғар шапқыншылығына және патша үкіметінің отаршылдық саясатына қарсы күрескен батырларымыздың өмір жолымен таныстыру;

- Батыр бабаларымыздың тәуелсіздік үшін күресін бейнелеу арқылы, жас жеткіншіктерді, елін, жерін, Отанын сүюге тәрбиелеу;

- Тарихи жеке тұлғалардың тарихтағы орнын көрсету;

- Тұлғаларымыз жайлы әдебиеттер және жаңа деректермен таныстыру;

- Сондай-ақ қазіргі танда сұраныстан кенжелеп қалып бара жатқан ақпарат, көркем әдебиет көздерін ашуда оқушылардың шығармашылық белсенділіктерін арттыру.

- Оқушыларды түрлі тарихи құжаттарды жан-жақты талдай білуге, өз ой пікірін ашық айтуға үйрету, оқушылардың ой-өрісін дамыту.

Күтілетін нәтиже:

• Ұлттық тарихта ерекше маңызы бар тарихи тұлғаларымызды танып біледі;

• Республика көлеміндегі жүргізіліп жатқан ғылыми зерттеулермен танысады.

Курсты ұйымдастыру формасы: білім беру формасы теориялық және практикалық бөлімдерінен тұрады.

Оқу жүктемесінің көлемі: аптасына 1 рет, оқу жылында 34 сағат