«Тәуелсіз елдің ұлы – өжет, қызы – қайратты»

«Тәуелсіз елдің ұлы – өжет, қызы – қайратты»

Президентіміз Қасым-Жомарт Тоқаев өзінің «Тәуелсіздік бәрінен қымбат» атты мақаласында: «Биыл қастерлі Тәуелсіздігімізге 30 жыл толады. Бұл –қайта жаңғырған қазақ мемлекеттігінің, ата-бабаларымыз аңсаған азаттықтың тұғыры нығая түскенін әйгілейтін маңызды белес. Тарих тұрғысынан алғанда, отыз жыл – көзді ашып жұмғандай қас-қағым сәт. Дегенмен, бұл көптеген халықтар үшін қиындығы мен қуанышы, дағдарысы мен дамуы алмасқан тұтас дәуір деуге болады. Біз де осындай жолдан өтіп келеміз», - деп тәуелсіздіктің маңыздылығын ерекше атап өтті. Тәуелсіздік оңайлықпен келмеді. Ата-бабаларымыз азаттық жолында арпалысты. Талай зұлмат замандар мен нәубеттерді бастан өткерді. Жасөспірімдерге ақ найзаның ұшымен, ақ білектің күшімен келген тәуелсіздіктің құндылығын ұғындыру, елге деген сүйіспеншіліктерін, елжандылық сезімдерін арттыру – әрбір сынып жетекшінің парызы емес пе?

Оқушылардың патриоттық сезімдерін арттырып, Тәуелсіздігіміздің 30 жылдығын дәріптеу мақсатында 9 «Ә» сыныбына «Тәуелсіздік жетістіктері» атты ашық сынып сағаты өткізілді. Оқушыларға, алдымен, тәуелсіздікке жету жолындағы зұлмат заман, батырлардың ерлігі, Желтоқсан құрбандары туралы ой қозғалды. Әрине, ең бірінші жетістігіміз - мемлекеттік рәміздеріміз, Ата Заңымыздың қабылдануы. 1991 жыл 29 тамызда Семей ядролық полигоны жабылды. 1992 жыл 2 наурызда Қазақстан БҰҰ-на мүше болды. 2017 жылы дүниежүзілік ЕХРО-2017 көрмесін өткізді. Қаншама спортшыларымыз жүзден жүйрік, мыңнан тұлпар атанып, халықаралық олимпиадаларда жүлделі орындардан көрініп жатыр. Осының бәрін пікірталас, әңгімелесу, сұрақ-жауап әдістері арқылы жас ұрпақтың бойына ұялату білгендеймін. Ашық сынып сағаты барысында Президент Қасым-Жомарт Тоқаев өзінің «Тәуелсіздік бәрінен қымбат» атты мақаласында ұсынған «Томирис», «Алмас қылыш», «Кейкі батыр», «Қазақ хандығы», «Жаужүрек мың бала» атты фильмдерін көру ұсынылды.

«Тәуелсіз елдің ұлы – өжет, қызы – қайратты», - деп Бауыржан Момышұлы айтқандай, болашақ ұрпақ еңселі еліміздің егемендігі алдында бас иеді, оны дәріптейді деген сенімдеміз.

С.Мәуленов атындағы гимназия

Жусупбекова Г.Е.