«Тәуелсіздік - ел тірегі »

Тақырыбы: «Тәуелсіздік - ел тірегі »
Мақсаты: Балаларға Қазақстан Республикасы туралы білім беру.
Балалардың тіл байлығын, сөзді байланыстырып сөйлеу қабілетін дамыту, туған елін, жерін сүюге тәрбиелеу.

Көрнекіліктері: Қазақстан картасы, рәміздер, суреттер, Отан туралы мақал-мәтелдер.
Тәрбиеші: Арайлап таң атты,
Алтын сәуле таратты 
Жарқырайды күніміз,
Жарқырайды  даламыз 
Біз бақытты баламыз,-дей  отырып, «Тәуелсіздік – ел тірегі» атты тәрбие  сағатымызды ашық  деп жариялаймыз.

Әрбір республиканың өз ерекшелігін білдіретін әнұраны, туы, елтаңбасы болады. Біз оны рәміздер деп атаймыз. Осы рәміздер  туралы жеке - жеке түсінік беріп өтейін. 
- Мынау - біздің туымыз. Тудың түсі аспанның түсіне ұқсайды.Көк аспандай көгілдір,ортасында күн, астында бүркіт  ұшып келе жатыр. 
- Мынау – ел таңбамыз. Елтаңбада шаңырақ, күн сәулесі, бес бұрышты жұлдыз, «Қазақстан » деген жазу бар.

Тоғжан:

Бақыт бірлік күн талабы,
Тоқтамайды дүбір әні.
Мәңгі бақи шырқалады,
Республика әнұраны.
Ән: «Әнұран»

Балалар, біздің Отанымыздың астанасы қай қала ?
- Астана қаласы
Ел бөбегі бүлдіршін жас баламыз,
Астанамыз Астана –бас қаламыз.
- балалар, үлкен  мерекелерде туымыз көтеріліп, әнұранымыз орындалады. Рәміздерімізді үлкен де, кіші құрметтеп жоғары ұстауы тиіс. Ал әнұранды  біз білеміз. Сендер елтаңба мен туды әрқашан  қастерлеуге тиіссіңдер.

Қарақат: 
Көк туымыз бетінде,
Қыран бүркіт қанатты.
Сол қырандай еркіндеп,
Біз өсеміз талапты.

Ақнұр: 
Айнымайды аспаннан,
Біздің тудың бояуы.
Оны  халық қашанда,
Биікке іліп қояды. 

К.Әнел:
Елтаңбасы елімнің ,
Қандай әйбат әдемі 
Тұнығындай  көңілдің ,
Ортада аспан әлемі 

Раушан:

Көк байрағы - бабамның,
Бүгінгі ұрпақ алауы.
Тірегі - әке баланың,
Қазақстан жалауы.

Әлібек:

Көк байрақтың бетінде,
Қыран бүркіт қанатты.
Сол қырандай еркіндеп,
Бала өседі талапты.
Нұржігіт:

Қатар шапқан қос тұлпар,
Ай астында қазақ үй.
Қалықтаған жас сұңқар,
Шарықтаған таза күй.
Бұл таңбасы елімнің,
Елдігімнің белгісі.
Аяжан:

Мерекеге шығады,
Бүкіл халық біліп қой.
Отандастар ұғады,
Тәуелсіздік ұлы той.
Қайсар:

Он алтыншы желтоқсан,
Тәуелсіздік алған күн.
Ерекше боп мәңгілік,
Ел жадында қалған күн.
-Жарайсыңдар, балалар. Біз Қазақстанда тұрамыз, демек, Отанымыз  -Қазақстан. Халқымызда « Отан отбасынан басталады» деген мақал бар. Сендер үлкен болып өскенде Отанымызды қорғайтын азамат боласыңдар.
Анель: Отан деген менің үйім,туған жерім.

Нұржігіт: Менің жүрегім Отан деп соғады.

Ақтаңберді: 
Азаматқа лайық ,
Отанымның ұлымын.
Отанымды қорғайтын,
Азаматтың бірімін. 
Отан деген –Атамекен,
Отан деген-туған жер.
Отан –ана,отан –үлкен,
Қазақстан - туған ел.

Ән: «Тәуелсіздік – ел ұланы»

- Балалар ,Қазақстан Республикасының ел басшысы кім?
- Нұрсұлтан Назарбаев атамыз.

Елбасымыз туралы кім тақпақ біледі ?

Ә.Әнел :
Шықты тарап ой данадан,
Бер қарады жұлдыз беті,
Өзі қалап сайлап алған,
Елімнің бар президенті.

- Балалар,өте жақсы.Егеменді елдің басты белгісі-тіл. Қазақ тілі мемлекеттік тіл болып саналады. Қазақ тілі –біздің ана тіліміз.

Гүлнар: 
Тілім барда мақтанам,
Тілім менің аппақ ән
Бірлігім бүгінгі,
Ана тілім сақтаған. 

Хабибі: 
Ана тілің арың бұл,
Ұятың боп тұр бетте,
Өзге тілдің бәрін біл
Өз тіліңді құрметте.

- Балалар,сендер отан туралы жан-жақты білетіндеріңді көрсеттіңдер. Енді біз Отан туралы мақал-мәтел айтайық.
Тоғжан: Отан –оттанда ыстық.
Қ. Мирас: Отан –елдің анасы,
Ел-ердің анасы.
Нұржігіт: Туған елдей ел болмас,
Туған жердей жер болмас.
Тәуелсіздік оңайшылықпен келмегенін білеміз. Алматы қаласында 1986 – жылы өткен желтоқсан көтерісінде өрімдей жастар, Қайрат Рысқұлбеков, Ләззат Асанова сияқты ағаларың мен апаларың елі, жері үшін құрбан болған. Біз оларды ұмытпауымыз керек. Міне, балалар , өміріміздің жалғасы, еліміздің қорғаны, тірегі сендерсіңдер!
Ән: «Әрқашан күн сөнбесін»
Құрметті ұстаздар! Абай атамыз айтқандай «Сенде бір кірпіш дүниеге,кетігін тапта ,бар қалан» деп , бүлдіршін балаларымыз қоғамымызға кірпіш болып қалана берсін деген тілекпен тәрбие сағатымызды аяқтаймыз. 

Гүлсезім: Білім - менің ертеңім
Өсу үшін өркенім
Жүзем оқу - айдында
Жайып білім желкенін
Қиындықтан өтуге
Армандарға жетуге
Білім алам ерінбей
Еліме қызмет етуге!

№1 Жамбыл атындағы орта мектебі

«Тәуелсіздік – ел тірегі»

Мектепалды даярлық тобы

МАД тәрбиешісі: Ахметова А.Ж.

2017 – 2018 жж.