Тәуелсіздік - ел тұғыры!

Тәуелсіздік – ел тұғыры!

«Тәуелсіздік»... Иә, осынау құдіретті сөзді естігенде қай қазақтың болмасын жүрегін дір еткізбеуі мүмкін емес. Бұл - ата-бабамыздың қанша жылдан бері аңсаған арманы еді. Бұл - ащы термен келген тәтті жеңіс. Себебі, халқымыз тәуелсіздік алғанға дейін қаншама қиындықты басынан өткерді. Қазақ халқы жоңғар шапқыншылығының зардабынан Ресей империясының қарамағына өтті, сталиншіл әкімшіл-әміршіл жүйенің озбырлығына ұшырады.

1941-1945 жылдардағы Ұлы Отан соғысы және кешегі 1986 жылғы қанды желтоқсан оқиғасы. Қазақтың жалынды жастары билік басшыларының шешіміне келіспей, ашық алаңға шығып, наразылығын білдірді. Қазақстандағы билікті тек қазақ басқаруы керек деп кеңестік билікке қарсы шықты. Осынау тәуелсіздіктің жолында қаншама боздақтарымыз қыршынан қиылды.

Қазақстан - желтоқсанның қатты желі мен суық ызғарына қарсы тұрып, жалынды жастардың асқақ рухы мен қайсар ерлігінің арқасында шаңырағы биік, керегесі кең мемлекет болып қалыптасты. Тәуелсіздікке қол жеткізгеннен кейін елеулі табыстарға қол жеткіздік. Қазақстанның ұлттық валютасы, әнұраны, туы, елтаңбасы пайда болды, қаншама жыл бойы езгіге түскен ана тіліміз қайта жаңғырды. Қазақстан құлдықтың құрсауынан босап, жаңа өмірге аяқ басты. Аздаған уақыт ішінде өзін күллі әлемге танытып үлгерді. Ата-бабамыздың аңсаған арманы орындалды.

Ендеше, Ғасырларға жеткен бүгін жыр үні,Тәуелсіздік ұлылықтың ұлығы, Шаңырағы биік болып қазақтың, Қисаймасын берік болсын уығы, - дей келе тәуелсіздігіміздің тұғыры биік, халқымыздың еңсесі жоғары, егемендігіміз баянды болсын деп тілеймін.