"Тәуелсіздік -тірегім" мақала

Тәуелсіздік - тірегім

Меніңше, Тәуелсіздік деген сөздің қадірі ерекше. Қасиетті де қастерлі ұғымға тұнып тұрған киелі атауды ата-бабаларымыз қаншама жылдар тіпті ғасырлар бойы аңсады десеңізші!...

Тәуелсіздік - әрбір адамның басты байлығы. Туған елің, ана тілің, әлем елдерімен терезесі тең өз мемлекетің болғанына не жетсін?! Еліміздің еркіндігі үшін халқымыз қаншама қиындықты, қиян-кескі соғыс  пен ашаршылықты, неше түрлі ауыртпалықтарды бастан өткеріп, жеңіп шығып бүгінгі күнге қол жеткізген еліміздің ерлігіне сүйсінемін. Осындай елдің перзенті екенімді сезінген сайын бойымды мақтаныш сезімі билейді.

1991 жылы Кеңес Одағының құрамынан бөлініп, өз шаңырағымызды көтергенімізге биыл 30 жыл болды. Осы азғантай ғана жылдардың ішінде еліміз еңсесін тіктеп, жеке мемлекет болып қалыптасты. Даму жолына түсті. Бұл жолда Елбасымыз Нұрсұлтан атамыздың еңбегі мен салиқалы саясаты өте көп. Өйткені тәуелсіз еліміздің өсіп-өркендеуіне, әлемге танылуына аянбай тер төкті. Еліміздің ортасында сұлулығы көз тартатын, әсем астанамыз Нұр-Сұлтан қаласы бой көтерді. Өзіміздің төл теңгеміз айналымға шықты. Елтаңбамыз бен көкте желбіреген туымыз бойымызға рух береді. Ұлан- ғайыр үлкен атамекенімізге бөтен адамды заңсыз кіргізбейтін берік шекарамыз бен айбынды әскеріміз бар.  Осы жетістіктердің бәріне Тәуелсіздіктің арқасында қол жеткіздік.

Жыл сайын қасиетті мерекеміз Тәуелсіздік күнінде елінің азаттығы жолында жанын қиған бабаларымызды еске алып, олардың ерлік істерін өзіме үлгі етемін. Жақсы оқып, болашақта білімді азамат болып қалыптасып, еліміздің дамуына үлес қоссақ деп армандаймын. Болашақта әлем елдерінің алдында ұлтымыздың беделі асқақтай түсу үшін, біз жақсы оқуымыз керек. Сонда ғана еліміздің мақтанышы мен тірегі болған Тәуелсіздігіміз мәңгілік болып, ұлы даланың төсінде өркендеп жайқала береді.

Қазақ тілі мен әдебиет пәнінің мұғалімі

Г. Мырзабекова