Тәуелсіздік тұғыры — Республика күні

Тәуелсіздік тұғыры — Республика күні

25 қазан — Қазақстан Республикасы үшін тарихи әрі тағдырлы күндердің бірі. Бұл — ел егемендігінің, мемлекеттік мәртебесінің айқын көрінісі болған Республика күні. Тарихқа көз жүгіртсек, 1990 жылы дәл осы күні Қазақ КСР-і өз егемендігін жариялап, шын мәніндегі тәуелсіздікке қадам басқан болатын. Бұл күн қазақ халқының өз тағдырын өзі шешуге бет бұрғанын айғақтайды.

Тарихтың алтын парағы

1990 жылдың 25 қазанында Қазақ Кеңестік Социалистік Республикасы Мемлекеттік егемендік туралы Декларацияны қабылдады. Бұл декларация Қазақстанның дербестігін, саяси, экономикалық, құқықтық тәуелсіздігін бекіткен тарихи құжат болды. Сол кезеңнен бастап ел тағдыры қазақ халқының өз қолына көшіп, жаңа даму дәуірі басталды.

Еліміз 1991 жылы толық тәуелсіздік алғанымен, Республика күні — егемендікке бастар алғашқы қадам ретінде, халқымыздың саяси еркіндігін білдіретін маңызды белес болып қала бермек.

Мемлекеттігіміздің мызғымас негізі

Республика күні – Тәуелсіз Қазақстанның мемлекеттігін, заң үстемдігін, ұлттық бірлігін дәріптейтін күн. Бұл мереке — тек өткенді еске алу ғана емес, сондай-ақ болашаққа бағытталған сенім мен жауапкершіліктің белгісі. Ел Президентінің бастамасымен бұл күн мемлекеттік мәртебе алып, 2022 жылдан бастап ұлттық мереке ретінде атап өтіліп келеді.

Ұрпақ санасында егемендік рухы

Бүгінгі ұрпақ үшін Республика күні — тарихты тану, ұлттың ұлы мұраттарын түсіну, Отан алдындағы борышты сезіну күні. Бұл күннің мәні мектеп қабырғасынан бастап, оқу орындарында, қоғамда кеңінен насихатталуы тиіс. Себебі ел болашағы — ел тарихын құрметтейтін, еркіндік пен бірлікті бағалай білетін жастардың қолында.

Республика күні — бұл жай ғана мейрам емес, елдік сана мен рухтың мерекесі. Мемлекеттігімізді нығайту, тәуелсіздігімізді сақтау, болашаққа берік қадам жасау үшін әр азамат осы күннің мән-маңызын жете түсініп, елге адал қызмет етуге ұмтылуы қажет.

Біз – бірлігі бекем, тарихы терең елміз. Осы бірлікті сақтай отырып, тәуелсіздіктің тұғырын бекемдейік!