"Тіл ашар" тәрбие сағаты

«Тілашар»  мерекесі

Мақсаты:  Алғаш мектеп табалдырығын аттаған бүлдіршіндерді білім алуға,оқуға шақыру.

Ұлттық дәстүр «Тілашар» тойы арқылы оқуға ынтасын арттыру,мектепке деген сүйіспеншілігін ояту. Қоршаған дүниені танып білуге жетелеу.Сахна мәдениетіне  тәрбиелеу.
Көрнекілігі: шарлар, нақыл сөздер, тақырып жазылған плакат.

Барысы:

Мұғалім:  Армысыздар қымбатты балалар, ардақты ата-аналар және қадірлі ұстаздар! Міне, бүгін сіздер кеше ғана білім баспалдағына алғаш рет қадам басқан, бүгінгі 1-сынып оқушыларының мерекесіне жиналып, «Тілашар» тойының куәгері болып отырсыздар Ендеше, бүлдіршіндеріміздің білім жолына аттаған қадамдарына сәт-сапар тілей отырып, бүгінгі  мереке иелерін ортаға шақырайық. Қарсы алыңыздар:

1. Дарынды дарабоз — Жаңтөре

2. Ұшқыр ойлы — Кади

3. Ерке мінезді Айым

4. Жаны жомарт — Айсулу

5. Жаны жайсаң – Әділет

6. Асыл да аяулы  Арай

Айым:    

Қуаныш бүгін мереке,

Шуағын шашып тұр әлем,

Тілашарға келген қуанып,

Бәрі бірге: Қонақтарға мың сәлем!

Мұғалім: Айналайын балалар,
Алдыңда Мектеп-Ана бар!
Өздеріңнен өседі,
Өнерлілер,даналар.
Өтті қызық көп күндер,
Жеті жасқа жеттіңдер.

Құтты болсын қадамың
Құтты болсын талабың
Мағжан атам айтқандай
Білім отын жаға біл.

Мұғалім:  

Шашу, шашу шашайық,

Ақ сандықты ашайық,

Бұл мереке, бұл тойдың

Бастаңғысын жасайық.    (Ортаға әже шығып, шашу шашады, батасын береді).
Әже: Өсті міне бойларың,

Өсті міне ойларың.

Қуанышқа жиналған

Құтты болсын тойларың.

Мұғалім: Шашу шашты әжелер,

Сылдырлатып теңгелер.

Тойымыздың шашуын, Сәт сапарға теңгерер.

Жаңтөре: 

Еркеңіздің мойнына,

Ақ жағасы жарасар.

Кел, келіңіз тойыма,

Тойымның аты – тілашар.

Әділет: Таудай биік талабым,
Оттай лаулап жанамын.
Салт-санасын сақтаймын,
Дала менен қаланың,
Мен мектепке барамын.

Жаңтөре: Қолға кітап аламын,
Маржан сүзіп табамын.
Жарқыратып кеудеме,
Жұлдыз етіп тағамын.
Мен мектепке барамын.

Айсулу: Мен оқушы баламын –

Оқып, білім аламын.

Мектеп-ұям, өзіңе

Арналады бал әнім.

1. Хор: « Сәлем саған мектебім » әні.

Айым: Мен тәртіпті баламын,
Түгел қағаз, қаламым.
Бір күн қалмай сабақтан,
Кілең «бестік» аламын.

Кади: Оқуды көп ойлаймыз,

Қызығына тоймаймыз.

Әріптерді үйреніп,

Өлең айтып, би билеп

Өнерден де қалмаймыз.

Мұғалім:  « Қошеметпен қол соғып, балаларды қарсы алайық!

3. Көрініс көрсету: «Оқушының достары» ертегісі

Қатысатындар:  Жатөре,Айым,Кади Әділет,Айсулу,Арай

 мұғалім:  Ерте,ертеде,ешкі жүні бөртеде Білім патшасында Мектеп сарайында  Оқушы бала өмір сүріпті. Ол сабақ оқығысы келеді, бірақ ешқандай жазатын, оқитың  құралы болмайды. Жылап келе жатса, алдынан қалам шығады:

Қалам-:  Арай Әй бала, сен неге жылап келе жатырсың?

Оқушы-Әділет : Менің сабақ оқығым келеді, бірақ менің ешқандай құралым жоқ. Соған жылап келемін.

Қалам-Арай : Ендеше сен менімен дос бол, мен саған жазуды үйретемін. Әдемі жазу жазсаң, мен өте риза боламын.

Оқушы- әділет Жарайды екеуміз дос болайық, ал мен сені қайда жазамын?

Қалам-Арай:     Мені дәптерге жазады. Жүр,  мен саған оқуға қажетті дәптер, қарындаш, өшіргіш, Әліппе деген  достарды тауып кездестірейін.

Автор-мұғалім:  Екеуі достарды іздеп келе жатса, олардың  барлығы  алдарынан шыға келеді.

Оқушы-Әділет: Қалам, мына тұрғандар кімдер? Олар не үшін қажет? Менімен қайсысы  дос бола алады ?

Дәптер-Жаңторе:     Мен дәптермін. Маған  жазу жазады. Мені оқушы таза ұстауы қажет. Менің бетімді жыртуға, сызуға, бояуға болмайды. Егер де әдемі, таза  жазса, 5- тік деген баға алады.

Қарындаш-Айсулу: Ал, менің атым — қарындаш. Менсіз ешбір оқушы геометриялық пішіндерді  сыза алмайды.Сурет салу үшінде мені қолданады. Менімен дос болсаң, мен саған сызуды, бояуды үйретемін. Бірақ ескертемін —  мені ұқыпты  ұстамасаң мен ренжимін.

Сауат ашу:  Айым  Ал мен болсам  —  бар кітапқа бас болған Ғылым атасы  -әліппемін. Мен саған 42 әріпті танытып, оқуға үйретемін. Егер де сен менің әріптерімді жаттап, жақсы оқысаң, озат оқушы атанасың.

Өшіргіш-Кади:      Менің атым – өшіргіш. Менің көмегім саған өте қажет. Өйткені сен қате сызсаң, шимайласаң мені қолданасың.

Қалам-Арай: Оқушы, бұның барлығы сенімен дос бола алады. Біз сенің сабақты жақсы оқуыңа көмектесеміз.  Тек сен біздің  жаңағы айтып кеткен шарттарымызды орындайсың ба?

ОқушыӘділет: Ия,ия шарттарыңды орындаймын. Менің сабақ оқығым келеді. Келіңдер, сендер менің достарым болыңдар.

Автор-Мұғалім:     Сөйтіп оқушы өзіне қажетті оқу құралдарын тауып, барлығымен  дос болып, Мектеп сарайындағы ең үлгілі, озат оқушы атанған екен.

Ән:  « мектебім Айым » .

Жатөре:

Мектеп — үлкен бағдаршам.
Ұстаз — шырақ ұстаушы.

Екеуі де аңғарсақ,
Бағыт жолын нұсқаушы.

Әділет:

Еркесімін атамның,

Еркесімін  анамның.

Толып биыл алтыға

Мен оқушы атандым.

Арқама сөмке асына

Мектепке барам асыға.

Айым: 

Өсірді ой сананы

Тіл дамыту сабағы.

Жаңылмай айтып үйрендік

Жаңылтпаш, жұмбақ, мақалды.

 "Ало" Әділет Айым"

Жаңтөре:  Өмірімнің көктемін,
Сенде өткізем деп келдім,
Алтын ұям – мектебім!
Оқып ғылым-білімін,
Ой аламын деп келдім,
Оттан ыстық мектебім!

Айым: Мектеп деген жақсы екен
Қызығы мол думанды.
Жақсы көрем бәрінен,
Әдемілеп жазғанды.
Жеті жасқа жеткенім,
Еркеліктен кеткенім.
Кітабымды қолтықтап,
Мектебіме жеткенім.

Арай: Ойыншық қалды жайында,

Әріптер бөлді көңілді.

Тәбетім жоқ ойынға,

Сезінем үлкен өзімді.

Қуыршақты тастадым,

Уақыт жоқ қой ойынға.

Әріпті құрай бастадым,

Сөздерді тізіп қоюға.

"Дө-ре-ми" әні Жантөре, Әділет

Кади:

 Әжептеуір бойым да,

Сабақ қана ойымда.

Оны ұқпас інім тек,

Шақырады ойынға.

Дейді «Жел боп есейік»

Қайдан білсін ол менің,

Кеткенімді есейіп.

Әділет:

 Кіп-кішкентай баламын,
Алтыдан асып барамын.
Сөмке алып мойныма
Мектепке мен барамын.
Озат  оқушы боламын,
Жақсы баға аламын.
Таудай үлкен талабым,
Содан жақсы сабағым.

Айсулу: 

Ұстаздарды мақтаймын,

Сенімдерін ақтаймын.

Біздікіндей мектепті

Әлем шарлап таппаймын.

Тақпағымды жаттаймын,

Сабағымды баптаймын.

Біздікіндей мектепті

Ешбір жерден таппаймын.

Мұғалім:    

Ұрпақпен ұласады мұрат арман,

Бәйтерек бой көтерер құба талдан.

Тойлаңдар,қуаныңдар, ағайындар,

Шалқып қайт, шаттық тойы —

Тілашардан!
Т – тәртіпті болайық                      Жаңтөре

І – ілімді бойға жинайық               Айсулу

Л – лашындай биік самғайық      Кади

А – ақылды азамат болайық        Әділет

Ш – шыншыл болайық                 Арай

А – айбынды болайық                    

Р – рахат өмір сүрейік                      Айым

Хормен:

 Мектеп – қамқор анамыз,
Оқып, білім аламыз.
Үлгілі  боп өсетін,
Біз – оқушы боламыз!

Хор: «Мұғалім»

Мұғалім : Ғылымның сырын ұғына,

Шығыңдар білім шыңына.

Ұқыптылық пен зеректік,

Жеткізер сендердей өренді

Білімнің нәрлі сырына.

Оқитын әрі жазатын,

Білімге қол созатын.

Құтты болсын  балдырған,

Оқушы деген жаңа атың.

• Құрметті оқушылар! «Оқушы» деген атқа лайық болып, ата-аналарыңды , ұстаздарыңды, құрбы- жолдастарыңды сыйлайтын әдепті, алғыр, зерек, тәртіпті болады деп сенім білдіремін.

• Келесі сөз кезегі әкімшілікке беріледі--------------------------------------------------------------------------------------------------------------------------------------------------

• Ата-аналарға: -----------------------------------------------------------------------------

• Қатысқандарына рахмет!

"Тіл ашар" мерекесінін талдауы

Тақырыбы: «Тілашар»  мерекесі

Мақсаты:  Алғаш мектеп табалдырығын аттаған бүлдіршіндерді білім алуға,оқуға шақыру.

Ұлттық дәстүр «Тілашар» тойы арқылы оқуға ынтасын арттыру,мектепке деген сүйіспеншілігін ояту. Қоршаған дүниені танып білуге жетелеу. Сахна мәдениетіне  тәрбиелеу.

Өткізілген іс-шара мерекенін барлық бағыттары бойынша құрылып, бекітілді. Іс-шара жоспарға сәйкес жүргізілді. Оқушылар өздерін жоғарғы деңгейде көрсете білді.Іс -шараны жүргізудегі әр бір қойылған мақсатыма қол жеткіздім.