Тілім менің – тірегім

Тілім менің – тірегім

Сыныбы: 5 «А»

Сабақтың тақырыбы: Тілім менің – тірегім

Сабақтың мақсаты: Жас ұрпақты ана тілін сүюге,тіл мәртебесін

көтеруге,шұбарламай сөйлеуге тәрбиелей отырып,өз

ұлтына,еліне,жеріне деген сүйіспеншілігін арттыру.

Сабақ барысы:

Мемлекеттік гимн орындалады.

1-жүргізуші: Тілім менің-тірегім,дінім менің,

Тілсіз қандай болады күнім менің?!

Өз халқыма жетеді өз мәнінде,

Өз тілімде оқылса жырым менің.

2-жүргізуші: Тілім менің-қуатым,күшім менің,

Күшім кетсе не болар ісім менің?!

Тілсіз өмір бар десе түсінбедім,

Тілімменен тірлікті мүсіндедім.

1-жүргізуші: Құрметті тіл жанашырлары,бүгінгі «Тілім менің-тірегім» атты тіл мерекесіне қош келдіңіздер!

2-жүргізуші: Туған тіл-ақыл-ой дамуының негізі және барша білімдердің қазынасы

1-жүргізуші: Тіл-рухи күре тамыр,тілден үлкен ана жоқ,

Тіл шегінсе,ұлт мүлде жоқ әрі ұлттық сана жоқ

Өз анасын шетке тебу рухсызға бақ па екен,

Бұл ғасырлық зұлымдықты қай қу ойлап тапты екен?

2-жүргізуші: Өз перзентін тек орысша оқытса ата-анасы,

Қазақ тілін ардақтауға жетпегені шамасы.

Егер тамыр жая алмаса бала ана тілінде,

Туған тілін тұңғыш тұғыр ете алмаса білімге

1-жүргізуші: Балалар, құтты болсын тілің бүгін,

Ашатын жан сарайын білімдінің.

Кешегі анаң айтқан,бабаң айтқан,

Тіліне зер салыңдар бұрынғының,- дей келе әдеби монтажымызды бастаймыз.

1-оқушы: Баба тілін қадірле,

Болашақтан түңілме!

Айналайын боздақтар,

Аралас тілге үңілме!

2-оқушы: Түзет құрып тізгінді,

Хат жазылсын өзара.

Жетілдір қазақ сөзіңді,

Жат алдында ез болмай,

Берік ұста өзіңді.

3-оқушы: Асан қайғы, Жиренше

Сөйлеп кеткен қазақ тіл

Қазақ тілді жек көрген,

Дүниеден қалар құр.

Бағаласаң шынымен,

Баба тілің-асыл нұр.

4-оқушы: Ана тілің,біліп қой,

Еркіндігің,теңдігің.

Ана тілің біліп қой,

Мақтанышың,елдігің.

5-оқушы: Болғанымен өзімнің жерім,өз бағым,

Болғанымен көңіл жүйрік,көз дарын.

Бәріне де жетемін деп жүргенде,

Өз тілімнен айрылып қала жаздадым.

6-оқушы: Сағындырған ана тілім армысың,

Сағындырған ана тілім бармысың?

Осы тілде бар азамат ұғысқан

Осы тілде талай жүрек табысқан.

7-оқушы: Су қараңғы болғанындай жанардың,

Тіл тағдыры тағдырындай Аралдың.

Гүлін қалай таптамақпын даламның,

Тілін қалай сақтамақпын анамның.

8-оқушы: Туған тілде сыры терең жаным бар,

Туған тілде әнім менен сәнім бар.

Туған тілім тіл болудан қалса егер,

Жүрегімді суырып-ақ алыңдар!

9-оқушы: Жаңа қазақ, шала қазақ жас інім,

Алшысынан тұрды бүгін асығың

Саған қарап ойландым да жасыдым,

Айырмаған азғыны мен асылын

Мына ғасыр,бәлкім,сенің ғасырың.

10-оқушы: Мына ғасыр - безбүйректеу ор ғасыр,

Жүрегінде сезім емес,қорғасын

Шетке қақты тұлпары мен жорғасын.

Қақпай қайтсін,бәрін сатып алуға

Һәм сатуға мүмкіндігі болғасын.

11-оқушы: Сенде қазір думан дәурен, масат күн

Өзіңді-өзің бар жауаптан босаттың

Рухани байлыққа да тас аттың

Аудандағы жалғыз кітап дүкенін

Сатып алып, сырахана жасаттың.

12-оқушы: Тез ашылып саудагерлік дарының,

Таудан,тастан қайтпастай өр арының.

Саудаладың Алматының жарымын

Ұлағатты ұлы қазақ елінде

Сатылмайтын байлықтар да бар інім.

2- жүргізуші: Тілім менің тірлігім

Тіл жайында толғанбайтын кім бүгін?

Тіл жайында үгіттейді кімді кім?

Тілім менің,тілім менің - тірлігім.

Ендігі кезекті көркем сөз оқу шеберлеріне берейік.

1. «Сізді не толғандырады?» деген сұраққа ақын М.Шахановтың жауабы

Оқитын – Сартай Нұрсат, Хабибулла Гүлшат

2. «Тауды сүйем» Аян Өрібаев. Оқитын – Мәулен Әліби

3. «Қазағыма» Аян Өрібаев. Оқитын – Қарамолдаева Дильназ

1-жүргізуші: Танытқан қазағымның қазақтығын,

Танытқан қазағымның азаттығын.

Танытқан қазағымның ғажаптығын,

Айналдым құдіретіңнен Қазақ тілім.

2-жүргізуші: Сары алтындай сабырлы парқы ерен шын

Қазағым,жаны жайсаң арқалы елсің.

Осынау дүбірі мол дүниеде

Әрқашанда мәртебең арта берсін!-деп сыныптан тыс іс-шарамызды аяқтаймыз.