«Төтенше жағдайлар кезінде әрекет етуге үйрету әдістемесі»

Қазіргі жаһандану дәуірінде ұлттық қауіпсіздік пен қорғаныс қабілетін нығайту – әрбір мемлекеттің стратегиялық басымдығы. Геосаяси ахуалдың өзгеруі, ақпараттық-цифрлық кеңістіктегі жаңа қауіп-қатерлер, техногендік және табиғи төтенше жағдайлардың артуы жас ұрпақтың қауіпсіздік мәдениетін жаңа деңгейде қалыптастыруды талап етеді. Осы тұрғыда 10–11 сыныптарға арналған «Әскери дайындық» пәні оқушыларды тек теориялық біліммен қаруландырып қана қоймай, өмірлік маңызы бар практикалық дағдыларды меңгертуге бағытталған. «Әскери дайындық» – патриоттық тәрбиенің өзегі болып табылатын кешенді пән. Оның мазмұны Қазақстан Республикасының Қарулы Күштерінің құрылымы мен қызметін, мемлекеттік рәміздер мен әскери анттың маңызын, ұлттық қорғаныс жүйесінің міндеттерін түсіндіруге негізделеді. Сонымен қатар пән аясында саптық және атыс дайындығы, алғашқы медициналық көмек көрсету, радиациялық және химиялық қауіпсіздік шаралары, төтенше жағдайларда әрекет ету алгоритмдері сияқты маңызды бағыттар қамтылады.