Туған жердің тазалығы – ортақ жауапкершілік

Алдашбай ахун ауылындағы №111 орта мектепте оқушылардың экологиялық мәдениетін қалыптастыру, қоршаған ортаға деген жауапкершілік сезімін арттыру мақсатында тағылымы мол экологиялық шара ұйымдастырылды. Бұл шараның негізгі мақсаты – жас ұрпақтың туған жерге деген сүйіспеншілігін арттырып, табиғатты аялауға, тазалықты сақтауға тәрбиелеу болды.

Шара барысында мектеп оқушылары мен ұстаздар бірлесіп ауыл көшелерін тазалау жұмыстарын жүргізді. Оқушылар қоршаған ортаның тазалығы әр адамның күнделікті әрекетінен басталатынын түсініп, туған ауылдың көркеюіне өз үлестерін қосты. Сонымен қатар мектеп аумағында тұрмыстық қалдықтарды сұрыптап жинау жұмыстары ұйымдастырылып, қоқысты дұрыс өңдеудің маңыздылығы түсіндірілді. Әр сыныпта қағаз, пластик және тұрмыстық қалдықтарға арналған арнайы жәшіктер қойылып, қоқысты бөліп жинау мәдениетін қалыптастыруға бағытталған жүйелі жұмыстар жүргізілді.

Іс-шара барысында оқушыларға экологиялық мәдениет, қоршаған ортаны қорғау, табиғи ресурстарды тиімді пайдалану туралы кең көлемде түсіндіру жұмыстары жүргізілді. Оқушылар тазалықты сақтау – тек бір күндік науқан емес, ол үздіксіз жалғасатын өмір салты екенін ұғынды. «Тазалық – саулық негізі, саулық – байлық негізі» деген нақыл сөздің мәнін түсінген білім алушылар табиғатты қорғау әр адамның азаматтық парызы екенін сезінді. Шараның тәрбиелік маңызы ерекше болды. Оқушылар ұжымдық еңбекке қатысу арқылы жауапкершілік, ұйымшылдық, табиғатқа жанашырлық сияқты қасиеттерді бойына сіңірді. Өз қолдарымен атқарған жұмыстар олардың қоршаған ортаға деген көзқарасын өзгертіп, экологиялық санасының қалыптасуына оң ықпал етті.

Мектеп ұжымы алдағы уақытта да экологиялық мәдениетті дамыту бағытындағы жұмыстарды жалғастыруды жоспарлап отыр. Атап айтқанда, «Эко-сағат» тәрбие сабақтарын өткізу, экологиялық тақырыптағы пікірталас алаңдарын ұйымдастыру, қайта өңдеуге жарамды қалдықтарды жинау акцияларын өткізу, табиғатты қорғау тақырыбында шығармашылық байқаулар мен ақпараттық семинарлар ұйымдастыру көзделуде. Мұндай жұмыстар оқушылардың табиғатқа деген жауапкершілігін арттырып, экологиялық сауаттылығын дамытуға мүмкіндік береді.

Қоршаған ортаны қорғау – бүгінгі қоғамның маңызды міндеттерінің бірі. Осы бағытта елімізде экологиялық мәдениетті қалыптастыруға ерекше мән беріліп, табиғатты қорғауға бағытталған бастамалар жүйелі түрде жүзеге асырылып келеді. Осындай игі істер жас ұрпақты табиғатты құрметтеуге тәрбиелеп, туған жердің тазалығын сақтауға бағыттайды. Туған жердің тазалығы – баршамызға ортақ құндылық, оны сақтау – әр азаматтың жауапты міндеті.