Түркістан облысы Төлеби ауданының білім бөліміне қарасты

«Бәйтерек» бөбекжайының музыкалық жетекшісі

Абжанова Жанар Бахтыбаевна

ЭССЕ

«Ұлттық құндылықтар – тәрбиенің түп қазығы»

Ұлттық тәрбие беру өзекті мәселеге айналуда. Балалардың патриоттық сезімін арттыру жолында ұлттық құндылық көздерімен сусындата тәрбие мен білім беру қажеттігі туындап отыр. Осы мәселені іске асыру үшін болашағымыздың рухани дамуын дұрыс жолға қоя білуіміз керек. Халқымыздың орасан зор адамгершілігімен, үлкенге деген құрметімен, кішіге ізетімен, қонақжайлылығымен, ақыл-парасатымен, көсемдігімен, шешендігімен, әділдігімен, өз мүддесін ұлт мүддесімен ұштастыруымен, ұлтжандылығымен, көрегендігімен ерекшеленетін салт-дәстүрі мен әдет-ғұрыптарын, мол мәдени, рухани мұраларын сақтап, оны заман өткен сайын еселеп жаңғырта түсетін қырларын балаларға ұғындыра мектепке дейінгі білім беруді негіздеу қажеттігі айқын.

Тәрбиенің негізі отбасында қалыптасады дегенмен мұнан кейін балабақшаның да ролі зор. Ұлттық тәрбиеден салт –дәстүр ауыз әдебиетінен нәр алып өскен ұрпақ қай кезде де аталар аманатына адал боларына кәміл сенеміз. Ұлттық салт-дәстүрді мәдениетпен өнерді насихаттау – тәрбиенің төресі.

Балабақшадағы сәбилерге жоғары деңгейдегі ұлттық сана сезімді, рухани мұраларға және ұлттық мәдениетке деген құндылықтарды, отансүйгіштік, ұлттық намыс сезімдерін қалыптастырады. 

Мақсатым:  балалардың ұлттық сана-сезім қалыптастыру, ұлттық құндылықтар мен жалпы адамзаттық құндылықтарды өзара ұштастыра алатын ұлтжанды тұлғаны тәрбиелеу.

Ұйымдастырылған оқу қызметі мен тәрбие шарасына негізделген жоспарда ұлттық құндылықтарымызды, мәдени мұрамызды насихаттауды басты назарға аламын. Осыған орай  біз ұлттық құндылықтардың қайнар көзі ретінде қазақ халқының тарихи мәдениетін, ұлттық мұрасын, ұлттық тәрбиесін негізге аламын. Ата-бабамыздың ұрпақтан ұрпаққа жеткен ұлттық мұрасын бағдарлама мазмұнына және балалардың жасына лайықты әдістерді қолданамын.