Ұстаз - ұлы есім

Ұстаз болу – жүректің батырлығы!

«Ұстаз деген ұлы есім» , «Ұстазы мықтының ұстамы мықты» деген қанатты сөздерді дана халқым қандай көрегенділікпен айтқан десеңізші! Шәкіртін өзіне тәнті ете алатын, еліктете білетін ұстазда не арман бар?! «Бала солқылдақ шыбық тәріздес , қалай тәрбиелесе солай өседі» - деп отырушы еді үлкендер.Шындығында қисық өсіп келе жатырған шыбықты дер кезінде күтіп, баптап , түзете білсең, түп-түзу ағаш болып өсіп кетеді емес пе?! Бала тәрбиесіне араласып, еңбек етіп келе жатырған аз ғана жылдың ішінде алдыңғы буын аға-апаларымыздан үйрене жүріп, мұғалім еңбегінің артар жүгінің жеңіл емес екенін ұққандаймын. Тек білім берумен ғана шектелемін деудің үлкен қателік екенін , біз – жастар естен шығармағанымыз абзал!

Осындай қиыншылығы мен қызығы мол ұстаз қауымын қолдау мақсатында көтеріліп жатырған мәселелер жастарды да қағаз бастылықтан әбден шаршап жүрген үлкен аға- апаларымызды да бір қуантып тастары хақ! Жасыратыны жоқ , қазіргі таңда өте жақсы мұғалім мамандар басқа салаларда жүргенін көпшілігіміз білеміз. Ұстаз мәртебесі көтерілетін болса тек мұғалімдерге ғана емес , қоғамға да пайдасы тиер еді деп ойлаймын. Себебі, кей кездерде «ұстазды сыйлау» деген түсініктің жоғалып бара жатырғанының да куәсі болып қалып жүреміз ғой.

Ең бастысы еліміз тыныш болып,бірлігіміз артып, саналы ұрпақ тәрбиесімен айналыса берейік ағайын!