Уәждемелік хат (үлгісі)

Уәждемелік хат

(Үлгі)

«Қазақстан Республикасы колледждерінің үздік 100 студенті» республикалық конкурсына қатысушы Сұлтанбек Аяулым Ержанқызынан

Мемлекет басшысы Қасым-Жомарт Тоқаев «Біз жұмыс­шы маман­дықтарын дәріптеу арқы­лы қоғамда еңбекқор және нағыз маман болу идеясын насихаттаймыз. Бұл «Адал азамат – Адал еңбек – Адал табыс» қағидатына толық сай келеді. Қоғам­да еңбекқорлық, кәсібилік сияқты қасиет­тер өте жоғары бағалануға тиіс»- деп Президентіміз жастарға көп үміт артты. Соған сәйкес менің де мамандығым да жұмысшы мамандықтарының бірі болғандықтан бұл қағида менің басты ұстанымыма айналды.

Ұлттық дәстүр мен құндылықтарымызды дәріптейтін «Тігіншілер әулетінде» алған өнегелі тәрбием «өз брендімді» қалыптастыруыма ықпал етті. Осы мақсатпен, республикаға танымал сән әлемінің талай саңлақтарын тәрбиелеген Шымкент қаласындағы «Жеңіл өнеркәсіп және сервис» колледжіне тігін саласы бойынша оқуға түстім. Мамандығым – «Тігін өндірісі және киімдерді үлгілеу», біліктілігім – «Модельер-пішуші». Өңірлік жеңіл өнеркәсіп саласының дамуына өз үлесімді қоса отырып, ғасырлар бойы ұрпақтар сабақтастығын жалғаған киім тігу өнерін бар әлемге танытып, Отан алдындағы перзенттік борышымды өтегім келеді.

Сән үйі «Burymdy» жеке брендімнің мақсаты – ұлттық киімдермен қатар қолданбалы-сәндік әшекей-бұйымдарын дайындау арқылы қоғамдағы қыз-келіншектердің сұраныстарын өтеу. Қазіргі таңда бұл кәсібім қарқынды дамып келеді.

«StartUp» жобасы бойынша дайындалған «EtnoDoker» бас киімдері мен «Burymdy» әшекейлерім қазаргі таңда жастар арасында ең көп сұранысқа ие үлгілердің бірі. Бас киімнің атауы ағылшын тіліндегі «Docker» — порт жұмысшысы сөзінен шыққан. Батыс елдерінде пайда болған бұл бас киімдерді заманауи стильмен ұштастырып, ұлттық үлгіде қайта дайындап шықтық.

Өз мақсатыма жетуде көптеп оқимын, ізденемін, аянбай еңбек ету керек екендігін білемін, қоғамдық қызметте де белсендімін. Колледжде «Парасат өзін-өзі басқару» ұйымының президентімін және «Лидер» дебаттық клубының мүшесімін. Кәсіби шеберлердің WorldSkills аймақтық чемпионатына қатысып, «Сән технологиясы» құзіреттілігі бойынша І орынға ие болдым.

«Өз кәсібін жетік меңгерген мамандар ұлт сапасын арттырады», - деп Мемлекет басшысы айтқандай, мамандықтың жаманы жоқ, кез келген еңбек – қадірлі. Ең бастысы, еліміздің әрбір азаматы жауапкершілікті терең сезініп, ұлт алдындағы борышын адал атқаруы тиіс. Мен де осы жолда аянбай еңбек етемін!

Жазған А.Тажибаева