«Ақмола облысы білім басқармасының Көкшетау қаласы бойынша білім бөлімі Көкшетау қаласының Сәкен Жүнісов атындағы №18 мектеп-лицейі» коммуналдық мемелекеттік мекемесінің педагог-психологі Шегирова Жадыра Батырбековна

ЭССЕ

Заманауи мұғалімнің келбеті

Ұстаздық- әрбір адамға беріле бермейтін ерекше бір қасиет. Заман өзгерген сайын соған қатысты ұстаз да , оның келбеті де өзгеріп отырады. Бұл жол үнемі ұстаздан қажырлы еңбек пен үнемі ізденісті талап етеді.

Қазіргі кездегі заманауи ұстаз дегеніміз-ол шәкіртінің жақын да жанашыр досы, кез келген сәтте оның жанын түсініп, қолдау көрсететін, жол көрсетететін жақын адамы. Заманауи ұстаз шәкірттерін өмірдің дұрыс жолына бағыттап, өзінің ақылын беріп отыратын ақылшы жан.

Қазіргі таңда жаңа Қазақстандағы мұғалімге қойылатын талаптар күннен-күнге артып келеді, сонымен қатар жауапкершілік те өсіп келеді. Соған қарамастан ұстаздарымыз заманмен қоса өркендеп, алға қарай ұмтылып, дамып келеді. Заманымыз алға жылжып, дамыған сайын мұғалімнің әдістемелік әлемі де түбегейлі өзгеруде. Бүгінгі күннің жаңа оқушысы білім берудің көптеген тың идеяларын қажет етеді. Сол себепті жаңа заман ұстазы да тың идеялар мен жаңа әдіс-тәсілдерді меңгерген, цифрлы сауатты болуы қажет. Қазақ атамыз айтқандай: «Заманың түлкі болып қашса, тазы болып қу» .

Оқушылардың басым көпшілігінде жаңа тақырыпты қабылдау ерекшеліктерін, олардың тапсырма орындау барысындағы түсінігін жетілдіру күннен күнге өзекті болып барады. Тапсырмалар орындауда олардың қызығушылығын арттыру, жаңа педагогикалық идеялар мен жаңа заман талабына сай технологияларда сабақ өту барысында пайдалану - мұғалімнің шеберлігін қажет етеді.

«Балам-болашағым» деген халықпыз, сондықтан да мұғалімнің алдында әрдайым атқарылар ұлы істер мен міндеттер тұратыны белгілі. Ел тізгінін болашақта өз қолдарына алатын сауатты, талантты оқушыларды тәрбиелеу - ұстаз алдындағы үлкен талаптың бірі. Заманауи мұғалім мейірімді, шыдамды, ең бастысы әділ және жауапты болуы қажет. Осындай жақсы қасиеттермен оқушыларға әрқашан үлгі болу керек. Бұл олардың адамгершілік қасиеттерін қалыптастыруға көп себебін тигізіп, оқушылардың білім алуына және қызығушылығын арттыруға көмектеседі. Сабақ барысында интерактивті әдістерді, топтық жұмыстарды, жобалау жұмыстарын қолдану - оқушылардың сабаққа белсенділігін арттырады.
Сонымен қатар, мұғалімнің бойында өзіне деген сенімділігі, оптимизмі және жаңашылдыққа ашық, креативті болуы да аса маңызды. Осы жақсы қасиеттерді тізбектей келе, ұстаз болу, оның ішінде заманауи ұстаз болу-әркімнің қолынан келе беретін іс емес екенін көз жеткізуге болады.

Заманауи мұғалімнің келбеті – бұл көпқырлы, жан-жақты, жаңашыл, ізденімпаз тұлға. Ол тек өз пәнін терең меңгеріп қана қоймай, өз білгенін оқушыларға шеберлікпен жеткізе алатын, заманауи технологияларды қолдана білетін, оқушылармен тиімді қарым-қатынас орнататын, жасанды интеллектті меңгерген, педагогикалық шеберлігі жоғары адам болуы қажет.

Заманауи ұстаз- ғылыми жаңалықтарды, білім беру саласындағы жаңа әдістемелерді, заң мен өзгерістерді үнемі қадағалап, кәсіби біліктілігін үздіксіз арттыруға тырысып, өз білімін одан сайын шыңдап отыруы қажет.

Осындай мұғалімдердің қазіргі заманның талаптарына сай білім беріп, болашақ ұрпақты саналы да білімді етіп тәрбиелей алатынына сенімдімін.

Қазіргі кезде өзге елдермен терезесі тең келетін, бәсекелестікке қабілетті, саналы ұрпақ даярлауымыз қажет. Сонда ғана еліміздің білім жүйесі ғана емес, барлық Қазақстан - жаңа заман талабына сай болады!