Қыс қызығы.

Мақсаты: Балалардың жыл мезгілдері туралы білімдерін кеңейту, қыс туралы қазақша сипаттай білуге үйрету, сөздік қорларын байыту, байланыстырып сөйлеуді қалыптастыру, есте сақтау қабілеттерін жетілдіру, сүйіспеншілікке, достық қарым- қатынасқа , әсемдікке тәрбиелеу.

Қажетті құрал- жабдықтар: Балабақша ауласына топсеруен, суреттер.

Сөздік жұмыс: Қыс мезгілі, қар жауады, күн суық, аппақ үлпілдек, жылтыр, шана, шаңғы, сырғанаймыз, аққала.

Шанамен сырғанап желетін,

Шаңғы, коньки тебетін.

Аққала жасап ойнайтын,

Қай мезгіл деп ойлайсың? (Қыс мезгілі).

Сұрақ- жауап:

• Қыс айларын атаңдар?

• Желтоқсан, қаңтар, ақпан.

• Бүгін аптаның қай күні?

• Жұма.

Дыбыстық жаттығу:

Ыс-ыс-ыс- қыс келді,

Ғы-ғы-ғы- шаңғы.

Ақ-ақ-ақ- аққала,

Қа-қа-қа- қар.

Ық-ық-ық- суық.

Жұмбақ шешу:

Қыста ғана болады,

Ұстасаң қолың тоңады. (Қар).

Көлге жапқан қақпақ,

Сіресіп тұр қатты- ақ. (Мұз).

Күміс тұяқ тұлпарды,

Eрттеп міндім тай қылып. (Коньки).

Зулап түсті төменге,

Шықпас менсіз төбеге. (Шана).

Қыста айна, көктемде- су. (Мұз).

Сөздік жұмысы:

Балабақша ауласына, ауа- райына, қысқы құбылыстарға қарап әңгімелейді.

Қыс мезгілі, қар жауады, күн суық, аппақ, үлпілдек, жылтыр, шана, шаңғы, сырғанаймыз, аққала.

Жаңылтпаш:

Дала аппақ,

Қар аппақ.

Бәрі аппақ,

Қар аппақ.

Сергіту сәті:

Қырау қатып жағаға,

Аяз беттен өбеді.

Бірі мініп шанаға,

Бірі шаңғы тебеді.

Мәнерлеп оқу:

Аппақ дала, аппақ қала,

Аппақ, аппақ айнала.

Аппақ, аппақ- бәрі аппақ, ақ қар аппақ, бор аппақ.

Ақ бұлт, қырау, мақта аппақ, ақ сүт, айран, қант аппақ.

Дидактикалық ойындар: «Аққала жасау».

Шарты: Балалар екі топқа бөлініп, қарды домалату арқылы, аққала құрастырады. Қай топ бірінші және дұрыс жасаса сол топ жеңімпаз.

«Қар жинау».

Шарты: Балалар екі топқа болініп қалақпен шелекке қар жинайды. Қай топтың шелегі қарға бірінші толады, сол топ жеңімпаз.

«Не артық?».

Шарты: Қыс мезгіліне қажет емес заттарды алып тастау. Шана, коньки, қар, пима, тон, көк шөп, көкөністер мен жемістер. Балалар заттарды ажыратып алады.