Арма ағайын! Алқалы жұрт көз көрген! Елін емірене сүйетін қазақ жұрты! Мен жалындаған қазақ жұртының бүгінгі ұрпағы, ұлтым өзбек болса да тілім қазақ, туғаннан қазақтың алып дала сахарасында Абай атамыздың алтын діңгегімен сусындап келемін. Мен үшін Абай жалғыз қазақ халқының ұлы емес, адамзаттың ардағы десек артық айтқандық болмас. Әлем халқы мойындаған дара тұлғаны қай жағынан әспеттесек те біздің елдік, ұлттық парызымызды орындағанымыз деп білемін. Осы жыл қазақтың ұлы ойшылының дүние есігін ашқанына 175 жыл толып отыр, осы орайда Қасым-Жомарт Кемелұлы атап өткендей, «Абай мұрасы – біздің ұлт болып бірігуімізге, ел болып дамуымызға жол ашатын қастерлі құндылық болуы тиіс». Абай жырлап өткен бабалар арманы мен өсиетін бүгінгі ұрпақ, тәуелсіз Қазақстанның бүгінгі және болашақтағы даму жолында абыроймен іске асыра алатынына сенімім мол. Себебі қазіргі заманғы қазақ жастарының бойынан талап пен жігерді, білім мен іскерлікті, ұлттық намыс пен қайсарлықты көремін. Мемлекет басшысының жарияланған мақаласы тарихи датаны әлемдік деңгейде ақыл-парасатпен атап өтуге бағыт-бағдар беретін, өз сәтінде жарық көрген бағалы еңбек деп санаймын. Мен Абайдай дананың ұрпағы болғаныма, қатаңдық пен шыншылдықты, біліммен әдепті, махаббатпен өнерді, адалдық пен намысты дәл осы Абай шығармаларымен тәлімінен танығаныма мақтанамын. Әрбір жүрекке Абай атамыздың рухани жылулығы Абай қалдырған мұрамен орын алсын деп өз ойымды аяқтағым келеді.