Адал азамат адал еңбек

Мемлекет басшысы Қасым-Жомарт Тоқаевтың Ұлттық құрылтайдың «Адал адам – Адал еңбек – Адал табыс» атты үшінші отырысында «Шын мәнінде, жеке мүддесін емес, ел мүддесін бәрінен биік қоятын азаматтар ұрпаққа үлгі болуы қажет», - деп айтқан болатын.

Ұрпаққа үлгі болар азамат – бұл тұлға қоғамда үлкен құрметке ие, адамгершілік қасиеттерімен, әділдігімен және жауапкершілігімен ерекшеленетін адам. Мұндай азаматтың өмірі мен әрекеттері жас ұрпақ үшін бағыт-бағдар боларлықтай терең мағыналы. Ол өз ісімен, сөздерімен және жүріс-тұрысымен өзгелерге өнеге көрсетіп, болашақ ұрпаққа дұрыс тәрбие берудің негізгі ұстанымдарын қалыптастырады.

«Үлкенге құрмет, кішіге ізет» деп айтқан дана халқымыз дүйім жұртқа үлгі болар азамат ең алдымен адамгершілігі мол тұлға болуы керек екенін өнеге ретінде айтып кеткен. Үлгі болар азамат - қоғамдағы адамдармен қарым-қатынасында әрдайым сыпайылық пен ізеттілік танытады, ешкімді алаламай, барлығына бірдей құрметпен қарайды. Адамгершілігі жоғары азамат ешкімге қиянат жасамайды, әрдайым адалдықты ұстанып, өз іс-әрекеттерімен шыншылдықтың үлгісін көрсетеді. Мұндай қасиеттері оны тек өз ұрпағына емес, бүкіл қоғамға үлгі етпек.

Ел алдында жүретін үлгілі азаматтың бойында болатын келесі қасиет әділдік. Әділдік – қоғамның негізгі тірегі, ал әділ азамат – сол қоғамның ең маңызды тұлғаларының бірі. Үлгі болар азамат әділдікті сақтап, әрдайым заңға бағынады. Өзінің қызметінде немесе жеке өмірінде болсын, ол әділетсіздікке жол бермейді. Жауапкершілік те азаматтың басты қасиеттерінің бірі. Жас ұрпаққа сенімді, жауапкершілікті азаматтың бейнесін көрсету арқылы, оларды да жауапты болуға, қоғам алдындағы міндеттерін адал орындауға тәрбиелеуге болады.

Үлгі болар азамат өзінің еңбекқорлығымен және табандылығымен де ерекшеленеді. Ол мақсатқа жету үшін қажырлы еңбек етудің маңыздылығын түсініп, жас ұрпаққа сол қасиетті үйретеді. Қиындықтарға мойымай, әрдайым алға ұмтылып, табанды болуды үлгі етеді. Еңбекқор азамат ешқашан жеңіл жолды таңдамайды, өз еңбегінің нәтижесімен мақтанады және осы арқылы өзінен кейінгі ұрпаққа дұрыс бағыт көрсетеді.

Ұрпақ тәрбиесінде отбасының орны ерекше. Үлгі болар азамат өз отбасына да үлкен жауапкершілікпен қарайды. Балаларын адалдыққа, жауапкершілікке, еңбекқорлыққа тәрбиелеп, оларға дұрыс бағыт-бағдар береді. Отбасындағы тәрбиенің басты негізі – сүйіспеншілік пен құрмет. Азамат өз отбасында осы құндылықтарды сақтап, балаларын да солай тәрбиелейді. Үлгі болар азамат өз ұрпағына қоғамға қызмет етудің маңыздылығын да үйретеді. Ол қоғамның дамуына өз үлесін қосып, қоғамдық істерде белсенділік танытады. Өзінің іс-әрекеттерімен басқаларға көмектесу, қайырымдылық жасау, қоғамның әл-ауқатын жақсартуға ұмтылу секілді құндылықтарды насихаттайды. Бұл арқылы ол жас ұрпаққа әлеуметтік жауапкершіліктің маңызын көрсетеді.

Қорытындылай келе, Ұрпаққа үлгі болар азамат – қоғамның алтын қазығы. Оның бойындағы жауапкершілік, әділдік және адамгершілік қасиеттері қоғамдағы тұрақтылық пен әділеттілікті қамтамасыз етеді. Оның өмірлік ұстанымдары мен іс-әрекеттері жас ұрпақ үшін тәрбие мен өнегенің сарқылмас көзі болып табылады. Мұндай азамат болашақ ұрпаққа тек сөзбен ғана емес, ісімен де үлгі көрсетіп, оларға адалдықты, жауапкершілікті, әділдікті және еңбекқорлықты үйретеді. Ұрпаққа үлгі болар азамат – қоғамның болашағына жол сілтейтін жарық шам.