"Адал ұстаз.Заманауи мұғалім" эссе

Адал ұстаз. Заманауи мұғалім

Адал ұстаз – шәкірттеріне білім берумен қатар жүрегіне адамгершілік, әділдік, мейірімділік сияқты қасиеттерді сіңіретін жан. Мұғалімнің адалдығы оның оқушылармен қарым-қатынасында, оларға деген шынайы қамқорлығында көрінеді. Адал ұстаз – өз ісіне берілген, өзінің қызметін адал атқаратын, шәкірттеріне үлгі болатын тұлға.

Адал ұстаздың басты мақсаты – шәкірттерін өмірдің әр саласында табысқа жетелейтін жолға салу. Ол баланың жүрегіне шынайы білімнің дәнін егіп, адалдық пен әділеттіліктің үлгісін көрсетеді. Мұндай ұстаздың тәлімі ешқашан ұмытылмайды, ол әрқашан шәкірттің жүрегінде мәңгілікке қалады.Адалдықтың ақ туын ұстаған ұстаздарымыз Ы.Алтынсарин.А.Байтұрсынұлы,М.Дулатов ұстаздық жолында тек білім беріп қана қоймай, шәкірттеріне адалдық пен әділдіктің, ізгілік пен адамгершіліктің үлгісін көрсете білген тұлғалар.Олар адалдықтың үлгісін көрсетіп, қазақ халқының болашағы үшін күресіп, шәкірттеріне ұлтжандылық пен адалдықты сіңірді,шындықты іздеуді және өз жолынан таймауды үйретті.А.Байтұрсынұлының «Адамға ең қымбат – ар мен намыс. Арлы адам – адаспайды»,-деген сөздері өмірлік ұстанымын және адамгершілікке, адалдыққа деген көзқарасын көрсетеді. Ол ар-намысты жоғары қоя отырып, адамның өмірдегі ең басты құндылықтарының бірі ретінде адалдықты дәріптеген.

Заманауи ұстаз ретінде шәкірттерге адалдықты үйрету өте маңызды, өйткені бұл қасиет олардың болашақта жауапты, әділ, және сенімді тұлға болып қалыптасуына ықпал етеді. «Шәкірттеріме адал болуды қалай үйретемін?» ,-деген сұрақ бәрімізді ойландырады.Балалар мен жасөспірімдер көбінесе өздерінің ұстаздарына қарап үлгі алады. Сіз өзіңіз адал бола отырып, оларға адалдықтың нақты көрінісін көрсетесіз. Бұл шынайы қарым-қатынас, шындықты айту, әділдікке басымдық беру,өз пікірін еркін білдіру және уәделеріңізді орындау арқылы жүзеге асады. Сонда ғана қазақтың ұлы ханы Абылай хандай әрқашан өз халқының мүддесін қорғап, әділ шешімдер қабылдаған, өз халқына адал болып, қазақ елінің бірлігін сақтаған ұрпақты тәрбиелейміз. «Алдау қоспай, адал еңбегін сатқан, қолы өнерлі қазақтың әулиесі сол! Алдама, өтірік айтпа» — деген ұлы Абай атамыздың дана сөздерін көкейіне түйген адал.әділ қоғам қалыптастырамыз.

Елдің абыройын асқақтатып, мәртебесін өсіретін, мәңгілік елдің адал ұрпақтарын қалыптастыратын, ел болашағын тәрбиелейтін ұстаздарымыздың, заманның ағымына іліскен заманауи мамандарымыздың еңбегі өлшеусіз. Адал ұстаз -тәуелсіз елдің сөнбес нұры, шамшырағы, мәңгілік елдің сәулесі.