Әдептілік – адамгершілік бастауы

Сабақ мақсаты: Оқушылардың әдептілік, инабаттылық сыйластық туралы түсініктерін кеңейту арқылы ақиқат құндылығының мәнін ашу.

Міндеттері:

Білімділік: -әдептілік, сыйластықтың адами қарым-қатынастағы мәнін ашу ақиқат құндылығымен байланыстыра отырып түсіндіру;

Дамытушылық: - ізетті, сыйластықты қарым-қатынас жасау іскерліктерін дамыту;

Тәрбиелік: - әдептілікке, ізеттілікке, инабаттылыққа тәрбиелеу.

Ресурстар: (слайд, музыка, бейнежазба,

мәлiметтер)

Сабақ барысы:

1. Ұйымдастыру кезеңi.

-Сәлеметсіздер ме, құрметті оқушылар!

-Мен сіздерді көргеніме қуаныштымын.

- Көңіл-күйлеріңіз қалай?

• Сынып оқушыларын түгендеу.

• Оқушыларды топқа бөлу. 2 түрлі гүлдің күлтелері таратылады. Оқушылар күлтелер бойынша бірігіп-бір гүлді құрап, топқа бөлінеді. (қызыл, сары)

2. «Өзін-өзі тану» сабағының ережесін «5Т» қайталау (тәртіп, тазалық, талап, тыныштық, татулық).

3. Тыныштық сәтi.

Нұрға бөлену

Ыңғайланып отырыңыздар, денелеріңізді түзу ұстаңыздар. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын және таза әсем гүл сіздің әр ойыңызды, әр сезіміңізді, эмоцияңыз бен тілек қалауыңызды шайып, жүрегіңіздің қауызын ашты.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналады. Одан әрі нұр сіздің ауызыңызға, тіліңізге тарады. Тіліңіз тек шындықты және жақсы, ізгі сөздерді ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздерімізге де жетті, көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Нұр бірте-бірте қарқын алып, шұғыла шаша бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз, олардың да жүрегі нұрға толсын.

Осы нұр бүкіл әлемге: барлық адамдарға, жан-жануарларға, өсімдіктерге, барлық тірі жанға таралсын...Ғаламның барлық түпкір-түпкіріне нұр бағыттаңыз. Ойша айтыңыз: «Мен нұрлымын... Нұр менің ішімде... Мен Нұрмын...»

Осындай нұр, Махаббат және Тыныштық күйінде отыра тұрыңыз...

Енді осы Нұрды жүрегіңізге орналастырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз.

Жаймен көзіңізді ашуға болады.

4. Үй тапсырмасын тексеру

102 бет. «Мен оны пір тұтамын» әңгімесін оқып келу.

• Мұраттың отбасына түскен қиындықты жеңуіне не себеп болды?

• Жақсы отбасы, адал жар болуы үшін адамға не қажет деп ойлайсыз?

Ескерту:

102 бет мәтінді оқу

5. Дәйексөз.

«Әдептілік, ар – ұят – адамдықтың белгісі».

Сұрақтар:

1. Дәйексөзден не түйдіңдер?

2. Өз өмірлеріңізден қандай мысал келтірер едіңіздер?

Оқушылардың жауаптарын тыңдаған соң, қорытынды жасаймын.

Дәйексөзді дәптерге жазғызу.

6. Оқиғаларды әңгiмелеу

Өсиет әңгіме:

Бір жұрттың үлкен оқымысты кісісі екінші бір елдің байымен сөйлесіп тұрғанда, қастарынан бір жарлы адам өтіп бара жатып,оқымыстыға келіп, басын иіп сәлем береді. Оқымысты басын одан да төменірек иіліп сәлемдеседі.

Қасындағы бай:

• Тақсыр, осынша біліміңіз бар ғалымсыз. Сөйте тұрып, жарлы адамға соншалық иіліп сәлемдесуіңіздің мәні қалай?- деп сұрайды.

Сонда ғалым тұрып:

• Ешбір ғылым - білім үйренбеген ол кісі әдептілік көрсеткенде, мен одан әдепсіз болып көрінсем, лайық па?-

деген екен.

Оқушыларға сұрақтар:

1. Жарлы адам мен ғалымның кішіпейілділігі олардың қандай іс-әрекет арқылы көрінді?

2. Өздерің әдептілік қалай танытасыңдар?

Бейнежазба көрсету

7. Шығармашылық іс-әрекет,топтық жұмыс

1-топ

«Әдептілік-адамгершілік бастауы» тақырыбын сахыналау(бастарынан өткен бір оқиғаны көрініс түрінде ортаға салу)

2-топ

Әдептілік ережесін жаз.

1. қоғамдық орында

2. мектепте,

3. көшеде,

4. қонақта отырғанда (постер жасау)

8. Топпен ән айту.

Дуние керуен (Жігіттер тобы)

1. Өтетін сейілмен,

Ей, дүние базарсың.

Пенделік пейілден

Жүрегім тазарсын.

Қайырмасы:Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

2. Қуаныш, қайғының

Бәрі де бітеді.

Бұл дүние таусылса,

Шын дүние күтеді.

Қайырмасы:Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

3. Амал қыл фәниде,

Иманның жолында.

Бәрі де, бәрі де,

Алланың қолында.

Қайырмасы:Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

9. Үй тапсырмасы. 110 бет «Туған күн» әңгімесін оқып, мазмұнын біліп келу.

10. Сабақтың соңғы тыныштық сәтi.

Баяу әуен қойылады. Оқушылар денесін, басын тік ұстап, көздерін жұмып отырады.

Мұғалім жәй дауыспен:

• Әрқайсысымыз оң қолымызбен жүрегімізді ұстап көрейік. Өз жүрегіміздің жылылығын сезініп, жүрек жылуымызды адамдарға, айналамызға жеткізу үшін іштей оларға жақсы тілектер тілейік. Жақсы ой ойлайық, жақсы сөз сөйлейік, жақсы іс жасайық! Бүгінгі сабақтан алған әсерімізді жүректеріңізге түйіп алыңыздар. Рахмет. Көздеріңізді ашуға болады.