Әке – шаңырақтың тірегі

Әр перзенттің жүрегінде ана мен әкенің алатын орны ерекше. Себебі, әкенің берер тәлім-тәрбиесі, ананың аялы алақаны, сүйіспеншілігі, жылулығы перзенттің өмірдегі бар баұыты. Баланың жарық дүниегедегі ең жақын адамдары да осы кісілер. «Әке» деген сөздің өзінде қаншама жылулық жатыр. Әке – ол қамқоршы, қорғаушы, отбасының тірегі, барлық ауыртпалықты көтеріп, шаңырағының биік болуы үшін аянбай тер төгетін асқар тау. Әкені өнегесін, тәрбиесін көріп өскен баланың болашағы жарқын болады деп есептеймін. Өйткені, әкенің орнын ешкім баса алмайды.

Әкенің баласына деген ерекше мейірімін сөзбен жеткізе алмайсың. Ұл баланың бәйтерегі, қыз баланың қамқоршысы – әке. «Әке көрген оқ жонар» деп бекер айтылмаса керек. Себебі әке бала үшін, әсіресе ер бала үшін ең жақын дос, сырлас, әрі үлгі тұтар азамат. Ұл баланың басты тәрбие берушісі, басты тірегі - ол әке. Ұлының мықты, батыл, қайсар, ақылды, болашаққа деген мақсаты айқын, ер мінезді болып өсуінде әкенің тәрбиесі маңызды рөл атқарады. Ал әкенің қызына деген махаббаты мүлде бөлек, ерекше болып келеді. Қыз баласын барлығынан жоғары қойып, әлпештеп, аялап өсіреді. Қызын гүлге балап, құлпырып, жайнап жүруіне әкесі бар үлесін, жылулығын қосады. Перзентінің өмірде еш нәрседен қиналмай, бақытты болуына әке өмірінің соңына дейін жауапты болып, Әрдайым баласының қорғаушысы, қолдаушысы болып жүреді. Сол себепті әкенің қадірін уақытында білу керек, Әкені сыйлап, үлгі тұтып, әрдайым биікке қойып, құрмет тұту әр баланың борышы.

Әкенің әр айтқан сөзі, іс-әрекеті бала үшін үлкен үлгі-өнеге. Баланың жастайынан адамгершілігі мол, жақсы азамат болып өсуіне әке жауапты. Себебі, әкенің жүрген ізін жалғастырушы бала болғандықтан, алдыңғы жол әрдайым дұрыс, мықты болуы керек деп санаймын. Ана - әке мен бала арасындағы көпір. Ананың әкеге деген құрметі, ыстық ықыласы, отбасының тірегі болып жүрген азаматты сыйлауы үлкен бақыт деп ойлаймын. Анашымыздың әкенің сөздерін, қалауын сөзсіз түсініп, балаларының әкелерін сыйлауына, құрметтеуіне себепші болары анық.

«Әке – асқар тау, ана бауырындағы бұлақ, бала – жағасындағы құрақ» деп қазақ халқы бекер айтпаған. Өйткені, отбасында әке – шаңырақтың тірегі болса, ана – отбасының ұйытқысы, бала - сол отбасының қуанышы, жемісі. Әке мен ана осы отбасының тамыры терең болып, мықты болуына жауапты.

Қорытындылай келе, әке – шаңырақтың тірегі екенін есімізден шығармай, берер үлгі-өнегесін бойымызға сіңіріп, жақсы азамат болып қалыптасуымыз керек. Әкенің арманын, үмітін ақтау біздің парызымыз.